Платных ранішніх груп падоўжанага дня ў школах быць не павінна. Гэта заявілі ў Міністэрстве адукацыі Беларусі, каменціруючы ініцыятыву некаторых школ.
З-за пераносу заняткаў на больш позні час адміністрацыі асобных навучальных устаноў прапанавалі бацькам аплачваць знаходжанне дзяцей у школе да ўрокаў. Спецыялісты ведамства правядуць тлумачальную гутарку з іх кіраўнікамі.
Раіса Сідарэнка, намеснік Міністра адукацыі Беларусі: "Гэта катэгарычна недапушчальна. Калі мы гаворым аб групах падоўжанага дня, гэта бясплатная паслуга, якая аказваецца ўстановамі адукацыі для навучэнцаў. І аплата там толькі за харчаванне. Калі дзяцей збіраюць у нейкую групу да пачатку заняткаў, значыць, настаўнікі і дырэктар школы павінны вызначыць, чым гэтыя дзеці будуць займацца".
Такая сітуацыя склалася і з платнымі факультатывамі, якія многія школы пераносяць на 8 раніцы. Па словах прадстаўнікоў Міністэрства адукацыі, мяняць час дадатковых заняткаў можна толькі са згоды вучняў і іх бацькоў.