МЗС Беларусі працягвае дапамагаць турыстам вяртацца на Радзіму

Дахаты дабраліся ўжо больш як 6 тысяч нашых грамадзян.

Дапамогу беларускага боку атрымліваюць і замежныя турысты, якія сутыкнуліся з закрыццём меж і масавай адменай авіярэйсаў.

Так, амерыканскае пасольства выказала падзяку кампаніі Belavia  за арганізацыю вяртання грамадзян ЗША. "Бяспека нашых грамадзян застаецца прыярытэтам, і з ростам абмежаванняў на камерцыйныя перавозкі мы дзякуем за шчодрую падтрымку і дапамогу Міністэрству замежных спраў Беларусі, Belavia і Нацыянальнаму аэрапорту Мінск”, - гаворыцца ў паведамленні амерыканскага пасольства ў Мінску.

Таксама словы падзякі ў адрас нашай краіны прагучалі ад міністра замежных спраў Швецыі. У сваім  Twitter   яна сказала дзякуй калегам з МЗС Беларусі, кампаніі Belavia і дыпламатам за дапамогу ў арганізацыі тэрміновага авіярэйсу са Стамбула, якім праз Мінск вярнуліся дахаты больш як 70 грамадзян Швецыі.

Падзяка беларусам выказана і брытанскім бокам. А чартарны рэйс Belavia з Аб'яднаных Арабскіх Эміратаў зрабіў шлях дахаты бліжэй для грамадзян яшчэ 8 краін.

Заўтра рэйсам Belavia з Індыі на Радзіму вернуцца яшчэ больш за сотню беларусаў. 

На фінальнай стадыі вырашэнне асобных найбольш вострых пытанняў дастаўкі нашых землякоў з далёкіх краін: Індыі, Шры-Ланкі, Сейшэльскіх астравоў, В'етнама і Тайланда.