Іншаземцы ляцяць дадому праз Мінск
Чартарным рэйсам Белавія грамадзяне Швецыі, ЗША і іншых краін вылецелі са Стамбула. Праз нашу сталіцу пралягае адзіны на сённяшні дзень маршрут, які дазваляе ім дабрацца да Стакгольма. За гэта гучаць цёплыя і шчырыя словы падзякі ў адрас беларусаў.
Так, міністр замежных спраў Швецыі ў сваім Twitter гаворыць вялікі дзякуй калегам з МЗС Беларусі, кампаніі "Белавія" і дыпламатам за дапамогу ў арганізацыі тэрміновага авіярэйсу са Стамбула, якім праз Мінск вярнуліся дадому больш за 70 грамадзян Швецыі.
На найбліжэйшыя дні плануецца вылет беларускіх грамадзян з Аб'яднаных Арабскіх Эміратаў. Як вядома, Белавія вымушана прыпыняе палёты ў Маскву (аэрапорты Дамадзедава і Шарамецьева), у гарады Украіны і Казахстана. У сувязі з гэтым пасольства Беларусі ў Расіі адпрацоўвае альтэрнатыўныя варыянты адпраўкі дадому 16 беларускіх грамадзян, якія прыбылі з Францыі, Мексікі і Катара. Таксама дыпламаты актуалізуюць спісы беларусаў, якія знаходзяцца ў Індыі, Шры-Ланцы, Непале, Бангладэш, на Мальдывах і ў В'етнаме.