Хуткасць, трапнасць і аператыўнасць … Менавіта па такіх крытэрыях выбіралі лепшых сярод ваенных лётчыкаў Беларусі, Расіі і Кітая. Міжнародны конкурс Авіядартс праходзіў на палігоне пад Варонежам. І тут нашы пілоты паказалі лепшыя вынікі ў бомбакіданні. Усе падрабязнасці ў Максіма Кароткіна.
Вайна, як і сур'ёзныя вучэнні, зусім не феерверк. Цяжкая праца пілотаў не заўсёды бачна іншаму воку. І толькі па кароткіх рэпліках суддзяў можна зразумець, якая прыкладная адзнака дзеянняў лётчыка.
Задача ў пілотаў у асноўны дзень спаборніцтваў максімальна складаная - выявіць цэль, апазнаць яе, адрозніць ад несапраўднай і дакладна паразіць. Усё гэта на хуткасці да 1000 км/ч і ва ўмовах моцнага ветру.
Палігон пад Варонежам, можна сказаць, хатні для расійскіх экіпажаў. Зрэшты, асаблівасцямі працы па тутэйшых цэлях расіяне шчодра дзяліліся і з беларусамі, і з кітайцамі. Праўда, нядзельная праграма моцна ўскладнілася ветрам і дымам ад ляснога пажару. Навязаць канкурэнцыю расійскім штурмавікам не атрымалася, затое ў бомбакіданні беларускім пілотам роўных у гэты дзень не было.
Рыхтуючыся да конкурсу, беларусы не атрымлівалі задачу перамогі любой цаной. Галоўная мэта - удасканаленне падрыхтоўкі ў канкурэнтных умовах і ўмацаванне ўзаемадзеяння з калегамі з іншых краін.
І ўсё ж сёння беларускія лётчыкі рыхтуюцца да будучых спаборніцтваў. Як чакаецца, праз год у Авіядартсе прымуць удзел больш за 10 краін, прычым арганізатары цалкам не супраць убачыць экіпажы з краін - удзельнікаў НАТА. Што ж тычыцца беларусаў, то ўжо прынята рашэнне, што ў 2015-м на конкурс прыляцяць нашы верталётчыкі. І ў гэтым відзе праграмы канкурэнцыя чакаецца значная.