Прыгажосць зарападу можна назіраць ужо зараз - ён пачынаецца з 9 вечара. Па сутнасці, гэта рэшткі каметы Свіфта-Тутля, якія трапляюць да нас у атмасферу пасля перасячэння з Зямлёй.
Дзе метэоры Персеіды будуць бачныя лепш за ўсё, чаму менавіта гэты зарапад лічыцца самым прыгожым - рэпартаж Кацярыны Шыбко.
Гэты зарапад лічыцца самым магутным у годзе. Менавіта сёння, паводле слоў астраномаў, метэорны паток Персеіды дасягае свайго максімуму. Зорны дождж можна будзе ўбачыць з 9 да 12 вечара. Спецыялісты раяць выязджаць за горад, каб неба было максімальна адкрытым і агляду не перашкаджалі вулічныя ліхтары. Але калі ў кагосьці такой магчымасці няма, зарапад можна будзе ўбачыць і ў горадзе. Напрыклад, у парку Горкага. Праўда, гэта будуць самыя яркія метэоры.
Свячэнне некаторых з іх можа доўжыцца да некалькіх секунд. Калі надвор'е не перашкодзіць, сёння можна будзе загадваць да 100 жаданняў за гадзіну - менавіта такі паток касмічных часціц прадказваюць спецыялісты. Хоць прызнаюцца, што сёлета многія ўжо назіралі за метэорамі Персеіды.
Астраном Віктар Малашчыц, напрыклад, напярэдадні нават паспеў зрабіць вось гэтыя фатаграфіі. Метэоры Персеіды адрозніваюцца ад іншых яшчэ і колерам. Як правіла, касмічныя часціцы з зеленаватым адценнем. Няўзброеным вокам убачыць гэта цяжка, але на фота, гавораць беларусы, якім удавалася зняць зарапад, цалкам рэальна.
Як высветлілася, большасць нашых суайчыннікаў аб падобных з'явах ведаюць загадзя і імкнуцца не прапусціць магчымасць загадаць жаданне. Калі хтосьці не паспее загадаць сёння хоць бы адно жаданне - астраномы раяць не хвалявацца, бо метэорны паток Персеіды можна будзе ўбачыць да канца месяца. Гэта, мабыць, яшчэ адна асаблівасць гэтага зарападу - ён лічыцца яшчэ і самым доўгім у годзе.
