Меры для эфектыўнага процідзеяння наркапагрозе распрацаваныя па выніках нарады ў Прэзідэнта

Справядлівасць і індывідуальны падыход да кожнага пэўнага выпадку - прынцып, які замацавалі ў комплексе мер для больш эфектыўнага процідзеяння нарказлачыннасці. Ён распрацаваны па выніках нарады ў Прэзідэнта, якая адбылася ў канцы кастрычніка, з прадстаўнікамі сілавых і праваахоўных структур. У прыватнасці, перагледжаныя крытэрыі ацэнкі працы праваахоўных органаў, засяроджана ўвага на адпаведнасці пакарання ўчыненаму злачынству. Комплекс новых мер прадугледжвае і магчымасць памілавання, а ў асобных выпадках - умоўна-датэрміновага вызвалення зняволеных паводле артыкулаў за наркотыкі.

Дзейнічаць зыходзячы з прынцыпу справядлівасці

Валерый Міцкевіч, намеснік кіраўніка Адміністрацыі Прэзідэнта Беларусі: "Зыходзячы з прынцыпу справядлівасці Прэзідэнт даручыў паглядзець, хто знаходзіцца ў месцах пазбаўлення волі. Магчыма, людзі ўжо ўсвядомілі, зразумелі, што яны спатыкнуліся. Калі яны сталі на шлях выпраўлення, магчыма і ўмоўна-датэрміновае вызваленне, але пры вызначаных умовах: калі гэтыя людзі сапраўды стануць на шлях выпраўлення, возьмуць на сябе абавязацельства працаўладкавацца або паступіць на вучобу".

Калі сваякі возьмуць на сябе адказнасць за гэтых людзей, гэта можа стаць падставай для памілавання. Аднак мера пры паўторным прыцягненні да адказнасці для тых, хто шанцам не скарыстаецца, будзе вельмі суровая.