Беларусь сёння ўспамінае падзеі 76-гадовай даўнасці. 22 чэрвеня 1941 года на досвітку Брэсцкая крэпасць першай сустрэла ворага. Наперадзе былі чатыры страшныя гады пазбаўленняў, барацьбы і мужнасці і... такая доўгачаканая перамога.
Каля пяцісот чалавек літаральна некалькі гадзін таму паказалі ключавыя эпізоды абароны Брэсцкай крэпасці. Тэатралізаваная пастаноўка "Уварванне" нагадала гледачам трагічную і гераічную гісторыю абароны Брэста.
Тысячы брастаўчан і турыстаў сталі сёння гледачамі ваенна-гістарычнай рэканструкцыі "22 чэрвеня. Брэсцкая крэпасць". Падзеі чэрвеньскіх дзён 1941 года на тэрыторыі Кобрынскага ўмацавання ўзнавілі ўжо сёмы раз. Нягледзячы на такую раннюю гадзіну, паназіраць за тэатралізаваным дзействам прыйшлі каля 10 тысяч жыхароў Брэста.
Уладзімір Весялоў, кіраўнік дэлегацыі з Ленінградскай вобласці: "Мы - пасляваеннае пакаленне. Нам немагчыма ўявіць, як гэта можна вытрымаць - тысячы дзён і начэй пад бесперапынным агнём, у зімовую сцюжу і ў летнюю спёку. Перамаглі і разбілі фашысцкага звера! Як гэта не памятаць! І як гэта можа не хваляваць кожнага, хто тут знаходзіцца, і наогул у Расіі і Беларусі".
На плошчы Цырыманіялаў у крэпасці прайшоў традыцыйны мітынг-рэквіем. Тут сабраліся тысячы жыхароў горада - ветэраны, кіраўніцтва рэгіёна і моладзь. Салдаты ўсклалі вянкі да мемарыяла, а пагранічнікі апусцілі кветкі ў воды Буга. Памяць герояў ушанавалі хвілінай маўчання. У мерапрыемствах удзельнічалі шматлікія дэлегацыі з Расіі, Украіны і Славакіі.
