Паправіць здароўе, атрымаць медыцынскую кансультацыю або даведку не выходзячы з дому. Першы філіял паліклінікі з’явіўся ў жылым сталічным доме. Сюды могуць звяртацца жыхары вуліц Гаруна, Калеснікава і Жыновіча. Усяго ў філіяле плануюць абслугоўваць каля 8 тысяч чалавек. Медыцыну крокавай даступнасці ацаніла Антаніна Станкевіч.
Рэжым работы як і ў звычайнай паліклініцы. Пацыентаў тут прымаюць з 7 раніцы да 8 вечара, у суботу - з 9 да 15.
У філіяле першую медыцынскую дапамогу аказваюць 4 урачы агульнай практыкі. Акрамя гэтага, тут можна зрабіць электракардыяграму, спіраметрыю ці праверыць зрок. Але па кансультацыю вузкага спецыяліста трэба звяртацца ў 26 паліклініку. А гэта 3 прыпынкі на грамадскім транспарце.
Атрымаць даведку, выпіску, а таксама назначэнні падчас звычайнай прастуды, напрыклад, тут змогуць 8 тысяч чалавек. Прыём вядуць не проста тэрапеўты – урачы агульнай практыкі. Такія спецыялісты аказваюць першасную хірургічную, афтальмалагічную і лор-дапамогу.
Зараз у філіяле абслугоўваюць жыхароў вуліц Гаруна, Жыновіча і Калеснікава. У найбліжэйшы час тут плануюць стварыць электронную базу звестак, каб урач адразу мог атрымаць здымак ці вынікі аналізаў, напрыклад, з галоўнай паліклінікі і правільна паставіць дыягназ.
У найбліжэйшы час такія ж філіялы павінны з’явіцца ў мікрараёне Зялёны Луг і жылым квартале Магістр. Акрамя таго, спецыялісты праектуюць амбулаторыю ў мікрараёне Лебядзіны. Такім чынам, вырашаюць дзве праблемы: з чэргамі ў паліклініках (філіялы дазваляюць разгрузіць іх працэнтаў на 10-15) і крокавай даступнасцю медыцыны.
Акрамя таго, да канца 2016 года ў сталіцы павінны адкрыцца яшчэ тры новыя паліклінікі. Дзве - дзіцячая і дарослая - у той жа Каменнай Горцы і дзіцячая ў Брылевічах.