МНС тэсціруе дадатак для ратавальнікаў

Аптымізацыя дзеянняў пажарных. На базе МНС ва Уруччы сёння тэсціруюць новы дадатак ад аднаго з беларускіх распрацоўшчыкаў. Ён дазволіць аўтаматычна разлічваць колькасць кіслароду ў балоне, а таксама час знаходжання ў задымленым памяшканні. Для гэтага былі створаны спецыяльныя ўмовы. Камеру запоўнілі дымам, дзе знаходзіўся пацярпелы. У дадатку кантралявалі знаходжанне і стан кожнага байца. На вучэннях у лічбавым фармаце пабываў Ілья Цвяткоў.

Сёння тут, на базе МНС ва Уруччы, вельмі дрэнная бачнасць. І гэта не з-за ўмоў надвор'я. Спецыяльную камеру запоўнілі дымам,  і ў ёй падчас умоўнага пажару ратавальнікі тэсціруюць новы дадатак па вывядзенні пажарных з агню. Новую распрацоўку аптымізавалі спецыяльна для падраздзяленняў МНС праграмісты адной з беларускіх IT-кампаній. Дадатак  дапамагае сачыць за ўзроўнем кіслароду ў балонах байцоў і падлічвае час, які застаецца да завяршэння аперацыі.

Да з'яўлення прылады байцам даводзілася рабіць разлікі складанымі формуламі  з дапамогай блакнота і алоўка прама ў задымленым будынку. Цяпер усё падлічвае праграма. Уводзіць новую праграму ў падраздзяленнях будуць паступова. Пакуль агняборцам дазволяць карыстацца як старымі, так і новымі спосабамі кантролю, каб ратавальнікі паспелі адаптавацца. Дадатак плануюць увесці ў эксплуатацыю ў найбліжэйшы час пасля некалькіх праверак. Па словах ратавальнікаў, ён дапаможа дзейнічаць больш эфектыўна ў экстрэмальнай сітуацыі,  а значыць  выратаваць яшчэ больш жыццяў.