МНС праводзіць вучэнні ў Мінскім раёне

Адключэнне электрычнасці, выбух на водаправодзе і аварыя на кацельнай станцыі. Надзвычайныя сітуацыі на асноўных цеплаэнергетычных вузлах  адпрацавалі сёння ратавальнікі Мінскай вобласці. Зладжанасць дзеянняў прадэманстравалі і іншыя аварыйныя службы раёна і работнікі прадпрыемстваў, на якіх адбыліся  ўмоўныя  аварыі. Падрабязна  Ілья Цвяткоў.

9 гадзін раніцы. За акном крыху развіднела. А ў аграгарадку Лашаны Мінскага раёна ўжо прагучала вучэбная трывога. Супрацоўнікі МНС сёння адпрацоўваюць надзвычайныя сітуацыі і аварыі на аб'ектах жыццезабеспячэння насельніцтва. Сцэнарый вучэнняў  насычаны. Надзвычайныя сітуацыі змадэлявалі на некалькіх лакацыях. Спачатку спецыялісты ліквідавалі ўмоўнае адключэнне электразабеспячэння гарадской кацельні. Затым справіліся з прарывам трубаправода.

У дапамогу супрацоўнікам МНС  усе аварыйныя службы раёна. Такія вучэнні праводзяць два разы на год для адпрацоўкі зладжанасці дзеянняў. У іх узялі ўдзел і работнікі кацельнага пункта. Апошні этап - абследаванне будынка кацельні. З-пад завалаў ратавальнікі вынеслі ўмоўнага пацярпелага.

На аднаўленне падагрэву вады ў ратавальнікаў не больш за 10 хвілін. Каб падтрымаць цеплазабеспячэнне,  у экстранным рэжыме на месцы аварыі ўсталявалі модульную кацельную станцыю. Такіх мабільных кацельных у вобласці ўсяго тры – яны знаходзяцца ў Мінску, Дзяржынску і Маладзечне. Ад таго, наколькі хутка іх даставяць на месца аварыі і падключаць усё неабходнае абсталяванне, залежыць ацяпленне цэлага населенага пункта ці нават раёна.