Майстар з Паўднёвай Карэі правёў чайную цырымонію ў Мінску

Пазнаёміцца з традыцыямі і пачаставацца карэйскай гарбатай. Упершыню ў Мінску майстар з Паўднёвай Карэі Вільям Лі правёў традыцыйную чайную цырымонію. Яе гісторыя налічвае некалькі тысяч гадоў. Карэя знакаміта сваім зялёным чаем, які спецыялісты збіраюць уручную.

Вільям Лі, прадстаўнік Карэйскай чайнай асацыяцыі: "У большасці краін гарбата - гэта проста напой, як вада ці сок. У Карэі гэта медытацыя і практыка для душы і цела. У нас існуе спецыяльны парадак цырымоніі. Гарбату заўсёды разлівае майстар - гаспадар дома. У маленькія кубкі для гасцей яе наліваюць злева направа. Спачатку атрымліваюць асалоду ад колеру, затым ад водару. І толькі пасля гэтага спрабуюць на смак".

Алёна Вялічка, арганізатар чайнага фестывалю ў Беларусі: "Вільям вядзе свой радавод са старажытнай знакамітай карэйскай сям'і. І ў яго дзядуля быў чайным міністрам. Таму ў яго сям'і захоўваюцца каштоўнасці культурнага маштабу. Гэта і посуд, і розныя прадметы мастацтва. Некаторыя з іх ён прывёз з сабою, каб паказаць на чайным фестывалі і вось у нас на мерапрыемствах".

Чайны фестываль пройдзе на гэтым тыдні пяты раз на пляцоўцы “Мінск-Арэны”.