Пасля абнаўлення праезная частка пашырыцца ўдвая, з'явяцца новыя пешаходныя пераходы і асвятляльныя мачты. Работы на вуліцы пачаліся ў маі гэтага года. Неабходнасць пашырэння дарогі ўзнікла ў першую чаргу з-за будаўніцтва новага буйнога жылога комплексу - насупраць Белтэлерадыёкампаніі. Пакуль пешаходы і аўтамабілісты адчуваюць нязручнасці - будаўнікі пераносяць інжынерныя сеткі і хутка пачнуць пашырэнне праезнай часткі.
Заказчыкам будаўнічых работ выступае камунальнае прадпрыемства "Гардарбуд", самі работы выконвае будаўнічы трэст №15.
Згодна з праектам, на вуліцы Макаёнка абсталююць пяць наземных пешаходных пераходаў, сумешчаных з велапераездамі. Чатыры з іх - са святлафорамі. Для стварэння безбар'ернага асяроддзя на пераходах зробяць нулявыя бардзюры і ўкладуць спецыяльную тактыльную плітку. З'явіцца і зона развароту - для зручнага пад'езду да Белтэлерадыёкампаніі.
