М1, Р53, Р23. У Мінскай вобласці рэканструююць аўтадарогі

Для бесперабойнага і камфортнага руху транспарту. Аўтадарогу М1 - Брэст - Мінск - мяжа Расіі неўзабаве чакае маштабная рэканструкцыя. Зараз у Міністэрстве транспарту і камунікацый рыхтуецца яе канцэпцыя. Работы на ўсёй працягласці - а гэта больш за 600 кіламетраў - будуць праходзіць паэтапна. Пасля мадэрнізацыі на М1, напрыклад, не змогуць выходзіць жывёлы, там забароняць рух пешаходаў і веласіпедыстаў. 

Яшчэ адзін стратэгічны для Беларусі напрамак - траса Р53, якая злучае сталіцу са Смалявічамі, Жодзінам і Барысавам. На першым участку зараз укладваюць цэментабетон. Уся траса стане чатырохпалоснай.

Аляксей Аўраменка, Міністр транспарту і камунікацый Беларусі: "Мы сёлета ўводзім першы ўчастак, 6 кіламетраў, дарога будзе першай катэгорыі ў цэментабетонавым выкананні. У наступным годзе мы ўжо пачалі і ўвядзём другі ўчастак. Тым самым мы злучым і дойдзем да Смалявіч. Гэта вельмі важны кірунак, і наша задача сёння - падрыхтаваць праект фінансавання гэтай дарогі далей - у кірунку Жодзіна і Барысава".

У Мінскай вобласці абнаўляецца і яшчэ адна важная транспартная артэрыя - гэта траса Р23 Мінск - Мікашэвічы. Участак аўтадарогі ад Слуцка да Салігорска стане чатырохпалосным. Работы завершаць да канца наступнага года.