Такую заяву сёння зрабіў старшыня Камітэта дзяржкантролю падчас рабочай паездкі ў найбольш пацярпелыя раёны. Стыхія прайшлася па кожнай вобласці нашай краіны, але асноўны ўдар прыйшоўся на Мінскі рэгіён. У Смалявіцкім і Чэрвеньскім раёнах шторм у літаральным сэнсе выкасіў векавыя лясы і разбурыў заказнікі. І калі своечасова не перапрацаваць вялікія аб'ёмы паваленых дрэў, яны стануць непрыдатнымі для выкарыстання. А гэта сур'ёзныя страты. Як ідуць работы, ацанілі нашы карэспандэнты.
Стыхія ў літаральным сэнсе выкасіла лес. Пацярпелі 510 населеных пунктаў. І ў першую чаргу неабходна было вярнуць людзям сувязь і электрычнасць.
Пасля ўзяліся за разбор буралому. На ліквідацыю наступстваў з бюджэту было выдзелена паўтара мільёна долараў. Да 1 лістапада ўсё павінна было быць прыведзена ў парадак, яшчэ тыдзень таму аб гэтым дакладвалі віцэ-прэм'еру Міхаілу Русаму. Але ўжо сёння пасля чарговай інспекцыі стала зразумела, што ліквідаваць наступствы за максімальна сціснутыя тэрміны не выходзіць.
Смалявіцкі раён аказаўся адным з найбольш пацярпелых, тут стыхія паваліла амаль 6 тысяч гектараў лесу. Гэта прыкладна паўтара мільёна кубаметраў драўніны. Разабраць гэты буралом сваімі сіламі мясцовы лясгас проста не змог бы. Плюс да ўсяго доўга драўніну ў такіх умовах захоўваць нельга, таму сюды былі накіраваныя чалавечы рэсурс і тэхніка з усёй краіны.
Такія харвестары задзейнічаныя практычна ва ўсіх раёнах, што пацярпелі ад разгулу стыхіі. Толькі ў Смалявіцкім і Чэрвеньскім іх каля 180 адзінак. Тэхніка замяняе брыгаду як мінімум з 30 супрацоўнікаў і робіць працэс разбору буралому максімальна хуткім і бяспечным.
Зараз адна з галоўных задач - адрадзіць тое, што разбурыла стыхія. Але для таго, каб дрэвы дасягнулі ранейшага памеру, трэба не менш за стагоддзе.
Старшыня Камітэта дзяржкантролю паведаміў, што сабекошт драўніны на пашкоджаных участках будзе вышэйшы прыкладна на 30%, чым той жа аб'ём на ўчастках планавых высечак. Прычына - складаныя ўмовы працы. Кіраўнік ведамства растлумачыў, што не варта чакаць зніжэння цэнаў на драўніну, іх будуць трымаць на прымальным узроўні, які дазволіць пакрыць выдаткі на прыбіранне сыравіны. Штодня толькі са Смалявіцкага раёна на перапрацоўку вязуць каля 50 вагонаў з драўнінай.
