Больш на 50… Менавіта на столькі павялічылася колькасць продажу сувенірных свечак з надыходам навагодніх і калядных свят. Адзіны вытворца такой прадукцыі ў цэнтральным рэгіёне зараз штодзень адгружае прыкладна тысячу свечак са свайго склада. Яны ж затым трапляюць на паліцы сталічных магазінаў. Як на невялікай мануфактуры паспяваюць за святочным наплывам і хто стварае навагодні дэкор - у сюжэце Наталлі Кезік.
Сваю першую свечку зрабіў на ўласнай кухні. Займацца такой чароўнай і загадкавай справай Раман Міхайлавіч марыў з дзяцінства. Тры гады таму праект падтрымала гарадское кіраўніцтва. Прадпрымальніку выдзелілі старое двухпавярховае памяшканне. Але з пэўнымі ўмовамі - 20 рабочых месцаў і капітальны рамонт будынку.
Раман Каралёў, дырэктар свечачнага завода: Тэма цікавая, хацелася нешта рабіць і атрымліваць ад гэтага задавальненне.
Цяпер свой завод ён сціпла называе мануфактурай. У аснове вытворчасці, зразумела, выключна ручная праца. Штат - 20 супрацоўнікаў, 12 з іх - майстры. Усе яны з нуля асвойвалі вядомы рэцэпт вырабу свечак, але з акцэнтам на ўласныя вынаходствы.
Для майстроў у гэтым памяшканні існуе адно і самае галоўнае правіла - свечку неабходна заліваць бесперапынна. Інакш парафін застыне слаямі і такі прадукт будзе лічыцца бракаваным. Правільна залітыя свечкі застываюць на працягу сутак. Затым майстры ўручную ўпільваюць кнот і балванка адпраўляецца ў цэх упрыгажэння. Свечкі размалёўваюць мастакі, аздабляюць дэкаратары. У якасці мастацкіх элементаў майстры не грэбуюць нават сапраўднымі фруктамі.
Вытворчасць свечак тут на поўную магутнасць запрацавала толькі сёлета. Два гады прыватнаму прадпрыемству спатрэбілася, каб наладзіць збыт. Такая прадукцыя - адзіная ў краіне - таму замяшчае імпартныя сувенірныя свечкі на прылаўках магазінаў, а затым і на святочных сталах беларусаў.
Кіраўніцтва прадпрыемства не ўтойвае, што летам працуюць у большасці на склад. Сезон актыўнага продажу пачынаецца з навагоднімі святамі. Зараз штодзень па заказах адгружаецца тысяча сувенірных свечак. І тут галоўнае, каб графік не парушылі пастаўкі парафіну. Яго майстрам неабходна пераплавіць і перапрацаваць, тым самым павялічыць час гарэння свечкі.
Раман Каралёў, дырэктар свечачнага завода: Вось гэтай свечкі час гарэння 120 гадзін. Калі ўзяць напрыклад такую ж свечку машыннай вытворчасці, яна будзе гарэць у два разы менш. Машынныя свечкі прэсуюцца з гранул парафіна. Яны значна лягчэйшыя і ў іх значна менш таго ж парафіну.
Нядаўна двухпавярховы будынак, які тры гады таму Раману Міхайлавічу дастаўся бясплатна, перайшоў ва ўласнасць прадпрымальніка. Зараз тут завяршаецца капітальны рамонт. І ўжо летам гаспадар плануе пашырыць вытворчасць. Як вынік - жыхары Узды атрымаюць яшчэ з дзясятак новых рабочых месцаў.
