Буйную фінансавую піраміду з прыбыткам у мільён долараў ліквідавала фінансавая міліцыя.
Як нам паведамілі, сёння пры сілавой падтрымцы АМАПа затрыманы 7 актыўных удзельнікаў групы і змешчаны ў ІЧУ. Паведамляецца, што яны дзейнічалі ад імя камерцыйнай структуры Kairos Technologies LTD. Яны абяцалі кліентам да 250 % гадавых - тыя, у сваю чаргу, выплачвалі ўступныя ўзносы ад 125 да 2 тысяч 777 долараў. Адзін са спосабаў заробку, які прапаноўваўся, - даваць дыскавую прастору асабістага камп'ютара для захоўвання на ім інфармацыі багатых кампаній, па другой схеме - пошук новых удзельнікаў схемы. Асноўныя арганізатары піраміды, адзначаюць у ДФР, атрымлівалі прыбытак да 10 тысяч долараў за месяц. Таксама грошы ішлі на прэзентацыі, банкеты і піяр, каб яшчэ больш раскруціць сваю дзейнасць, а фактычна раздуць кліенцкую базу.
Аляксандр Іваноў, намеснік начальніка ўпраўлення УДФР КДК Беларусі па Мінскай вобласці і Мінску: "Мы як раз менавіта як фінансавую піраміду яе і разглядаем. Таму што прыбытак першыя ўдзельнікі фінансавай піраміды атрымлівалі за кошт грашовых сродкаў, які прыносілі прыцягнутыя імі пазней. Адпаведна, як толькі махавік спыняўся і паток грашовых сродкаў слабеў, іх ужо не хапала на выплаты тым, хто ўжо быў. Узнімалася хваля незадаволенасці, і піраміда разбураецца. Як і любая піраміда, якая разлічана на прыцягненне новых удзельнікаў".
Паведамляецца, што ў схеме былі задзейнічаны не менш за 400 беларусаў па ўсёй краіне. Зараз праваахоўнікі аб’явілі пошук пацярпелых ад рук шэрых бізнесменаў. Крымінальная справа ўзбуджана па артыкуле "Незаконная прадпрымальніцкая дзейнасць". Праведзены 15 вобыскаў па месцы жыхарства зламыснікаў, канфіскаваны дзясяткі адзінак камп'ютарнай тэхнікі і мабільных тэлефонаў, якія змяшчаюць інфармацыю аб незаконнай дзейнасці. Накладзены арышт на маёмасць падазроных - а гэта нерухомасць і дарагія аўтамабілі. У ДФР пераконваюць, што фінансавая піраміда мае транснацыянальныя карані. Першапачаткова адзначаная злачынная схема была створана і апрабавана ў Расіі і Украіне.
