Алена Борматава стала сведкай развітання з цудатворнай святыняй. Сёння - у апошні дзень знаходжання Крыжа апостала Андрэя Першазванага на землях Белай Русі - рэліквію для глыбокай пашаны прынеслі ў невялікі драўляны храм Святой Жыццепачатнай Тройцы прыхода Усіх Святых, дзе прайшла літургія.
У царкву, якую будавалі паводле канонаў 12 стагоддзя без адзінага цвіка, ішлі веруючыя, каб у апошнія хвіліны знаходжання святыні ў храме паспець ёй пакланіцца. Андрэеўскі крыж пакідаў нашы землі ў суправаджэнні іерархаў Эладскай царквы - царквы, якая дала дабро на першае ў гісторыі падарожжа цудатворнага Крыжа.
Тым, хто не паспеў пакланіцца святыні, у прыходзе Усіх Святых раздавалі абразы Святога апостала Андрэя Першазванага. Іх прыкладвалі да Крыжа, на якім быў раскрыжаваны апостал - першы вучань Хрыста, і яны маюць такую ж цудатворную сілу, як і рэліквія, да якой яны дакраналіся, так што без заступніцтва Андрэя Першазванага не застаўся ніхто.
Крыж, на якім раскрыжавалі апостала Андрэя, не захаваўся цалкам. Вырабілі кіёт па форме таго крыжа, на якім прыняў смерць вучань Ісуса Хрыста. І туды змясцілі часцінкі рэліквіі, якія захаваліся. У Грэцыі Крыж захоўваецца ў футарале з бронзы. Для падарожжа вырабілі драўляны саркафаг з адной з самых трывалых і дарагіх парод дрэва ў свеце - бірманскага ціка. Важыць ён 160 кілаграмаў.
Каля апоўдня пад гук званоў цудатворную святыню ўслед за абразам Святога апостала Андрэя выносяць з царквы. У суправаджэнні аховы машына адпраўляецца ў аэрапорт.
Трохметровую хрысціянскую святыню ўсталёўваюць прама ў памяшканні аэравакзала. Такім чынам, у працаўнікоў аэрапорта з'яўляецца магчымасць дакрануцца і пакланіцца крыжу Андрэя Першазванага.
У той самы момант, калі Андрэеўскі крыж вывезлі на ўзлётнае поле, пайшоў дождж. Так Беларусь праводзіла святыню. За час знаходжання рэліквіі ў нашай краіне ёй паспелі пакланіцца каля паўмільёна чалавек.
На радзіму - у грэчаскі горад Патры - Крыж Андрэя Першазванага адправіўся чартарным рэйсам на ТУ-154 з бартавым нумарам 85042.
