Прыпынак "Заходні" ў Дзяржынску ў гэтую нядзелю стаў канцавым для 10-гадовай школьніцы. Кантралёр высадзіла дзяўчынку на ўскраіне горада, практычна ў чыстым полі. З-за адсутнасці даведкі з месца вучобы. Якімі ж інструкцыямі кіраваліся супрацоўнікі аўтобуснага парка? І што за "вочную стаўку" сёння арганізавалі для Яны? Усе дэталі доўгай дарогі дамоў у Наталлі Тарасюк.
У пачатку пятай у нядзелю 10-гадовую школьніцу Яну кантралёр высадзіла з аўтобуса з-за адсутнасці даведкі. Праўда, тады было зусім іншае надвор'е: пахмурна і ішоў снег. Дзяўчынцы прыйшлося адной у бязлюдным месцы чакаць маці некаторы час. Цяжка сказаць, ці менавіта гэта паўплывала на самаадчуванне дзіцяці, але ўжо некалькі дзён Яна не ходзіць у школу з-за тэмпературы.
Нягледзячы на гэта, сёння школьніца вытрымала больш чым паўгадзінную сустрэчу з кіраўніцтвам аўтобуснага парка № 15. "Вочная стаўка" з кантралёрам, якая высадзіла дзяўчынку, праходзіла за зачыненымі дзвярамі, нашу здымачную групу не пусцілі. На сустрэчу Яна прыйшла з мамай, якая пасля нядзельнага інцыдэнту напісала заяву ў гарвыканкам.
Вынікам гэтай сустрэчы сталі выбачэнні ад парка, аўтобусным маршрутам № 1 якога Яна павінна была дабрацца дамоў. Але прыпынак "Заходні" ў той дзень стаў канцавым для 10-гадовай школьніцы. Дзяўчынка забылася даведку з месца вучобы. Праўда, такі дакумент не дае права бясплатнага праезду для школьнікаў у нядзелю. Аднак, у любым выпадку высаджваць дзіця з транспарту кантралёр не можа.
Па словах дырэктара парка, дзяўчынка тройчы не змагла паказаць на супрацоўніка, які яе высадзіў.
Знайсці кантралёра, які высадзіў дзяўчынку, аказалася непасільнай задачай для аўтобуснага парка, нават улічваючы той факт, што там працуе толькі адзін такі супрацоўнік. Што яго чакае: пазбаўленне прэміі, вымова або справа абмяжуецца толькі гэтай своеасаблівай "вочнай стаўкай", стане вядома, па словах дырэктара парка, дзён праз 15.
