Сёння Кіраўнік дзяржавы падпісаў адразу тры эканамічныя дырэктывы - яны датычацца сельскай гаспадаркі, будаўнічай галіны і ЖКГ. Пра нюансы і мэты прынятых дакументаў мы распавядзем дэталёва ў эфірах "Панарамы" - нашы карэспандэнты ўжо рыхтуюць серыю рэпартажаў.
Такім чынам, дарожную карту развіцця атрымалі камунальныя службы. Павышаць якасць паслуг, зніжаць выдаткі галіны і ствараць камфортнае для пражывання асяроддзе - гэта галоўныя задачы, якія сёння стаяць перад сістэмай ЖКГ. Іх дэталёва пазначыў Кіраўнік дзяржавы. Усе яны адлюстраваныя ў дырэктыве. Важны нюанс - тарыфная палітыка павінна быць справядлівай. Павышэнне сум у квітанцыях на аплату камунальных паслуг - у звязку з узроўнем прыбыткаў насельніцтва. Гэтая формула будзе вытрымлівацца і надалей. Акрамя таго, спажыўцоў забяспечаць якаснай пітнай вадой незалежна ад раёна пражывання, нарасцяць аб'ёмы капрамонту, а бізнесу дадуць больш магчымасцяў працаваць у сферы ЖКП нараўне з дзяржарганізацыямі.
Віталь Смірноў, намеснік міністра жыллёва-камунальнай гаспадаркі Беларусі: "У дырэктыве 6 раздзелаў. Кожны накіраваны на рашэнне тых або іншых задач. Гэта забеспячэнне ўсіх спажыўцоў якаснай пітнай вадой да 2025 года, гэта выкананне своечасовага капітальнага рамонту ў аб'ёмах не меней за 3 працэнты ад наяўнага жылога фонду, гэта замены састарэлай сістэмы водазабеспячэння таксама ў аб'ёме не меней за 3 працэнты ад усіх сетак, у якіх ужо мінуў тэрмін эксплуатацыі. Важны момант у дырэктыве - жыллёва-камунальныя паслугі павінны аказвацца на канкурэнтнай аснове. Прычым няма размежаванняў, прыватны бізнес або дзяржаўныя прадпрыемствы. Галоўнае - каб аказваліся яны якасна".
Развіццё атрымаюць механізмы дзяржпадтрымкі малазабяспечаных катэгорый грамадзян. Стане больш стымулаў для ўжывання энергаэфектыўных тэхналогій. Добрая навіна і для “зялёных” спажыўцоў: поліэтыленавая ўпакоўка паэтапна сыдзе ў мінулае. На змену прыйдзе шкло і папера.
