Рэканструкцыя Камароўскага рынку завершыцца ў 2024 годзе

Рэканструкцыя Камароўскага рынку ў Мінску, якая пачалася сёлета, будзе праходзіць у некалькі этапаў і завершыцца ў 2024 годзе. Згодна з планам, пабудуюць асобны бокс для збору і сартавання смецця, новы склад-халадзільнік, а таксама заменяць вітражы на крытым рынку. Яны будуць адкрывацца аўтаматычна і ахоўваць гандлёвыя рады ад сонечных промняў летам для камфорту і зручнасці прадаўцоў і пакупнікоў. Новая падстанцыя, якую ўсталявалі сёлета, дазволіла палепшыць сістэму вентыляцыі. Да таго ж, сёлета выдзелілі яшчэ паўсотні месцаў для гандлю сезоннай прадукцыяй. Уся прадукцыя праходзіць строгі кантроль якасці.

Ужо з пятніцы на гандлёвых радах сезоннага рынку можна будзе набыць навагоднія цацкі, святочны дэкор, светлавыя гірлянды. А ў наступным месяцы ў продажы з'явяцца елкі. Навагоднія дрэвы будуць прадаваць на дзесяці пляцоўках.