"ДАКАР-2020". Беларусы пакараюць пяскі Саудаўскай Аравіі
Насустрач новым выпрабаванням і чарговым перамогам. Каманда Мінскага аўтазавода "МАЗ-СПОРТаўта" сёння адправілася на міжнароднае ралі "Дакар". Гэтым разам легендарныя гонкі ўпершыню пройдуць на тэрыторыі Саудаўскай Аравіі. Дэбютуе ў марафоне і новы фармат спартыўнага грузавіка - капотны МАЗ. Каманда беларусаў - гэта тры экіпажы пад кіраўніцтвам Сяргея Вязовіча. Спартсмены добра падрыхтаваліся маральна і тэхнічна. Разам з імі на ралі адправіўся і аўтадом. "Дакар" пачнецца 5 студзеня ў горадзе Джыда і працягнецца ў аравійскіх пясках амаль два тыдні. Наперадзе ў гоншчыкаў амаль 8 тысяч кіламетраў.Сяргей Вязовіч, кіраўнік каманды "МАЗ-СПОРТаўта": "Што насамрэч нас чакае, мы да канца не ведаем. Гэта камяністыя і горныя ўчасткі і вялікая працягласць пясчаных дарог і дзюн. Ці з'яўляецца гэта праблемай для нас? Не, не з'яўляецца. Таму што ў нас ёсць такі прынцып: чым горшая траса, тым лепш для нас. Таму што там вельмі хутка адбываецца расстаноўка сіл сярод сапернікаў".
Пра тое, што каманда беларусаў у добрай форме, гавораць і вынікі выступленняў гэтага года. На гонках у Марока нашы спартсмены былі самымі хуткімі. Большую частку ралі яны лідзіравалі і на "Шаўковым шляху".