Следчы камітэт сёння завёў крымінальную справу па факце знікнення Максіма Мархалюка. Ход пошукаў хлопчыка сёння асабіста пракаменціраваў кіраўнік ведамства. Паводле слоў Івана Наскевіча, гэта звычайная працэдура пасля 10 дзён з падачы заявы. І артыкул "Забойства" ў гэтым выпадку пакуль беспадстаўны і амаральны. Зараз няма падставы быць упэўненым у тым, што хлопчыка забілі. Аднак не выключаецца ні адна версія таямнічага інцыдэнту. Пошукі працягваюцца. Праваахоўнікі правяраюць усе месцы, дзе мог знаходзіцца школьнік, вывучаюць сабраныя матэрыялы. Нагадаем, 10-гадовы Максім Мархалюк пайшоў у лес па грыбы 16 верасня. Увесь гэты час у выратавальнай аперацыі ўдзельнічаюць валанцёры, супрацоўнікі МНС, міліцыі, леснікі і мясцовыя жыхары. Прыцягнутая авіяцыя з цеплавізарамі. Паводле некаторых звестак, ужо адпрацаваная мясцовасць, куды за гэты час мог максімальна зайсці хлопчык.
Дарэчы, згодна з інфармацыяй міліцыі, у гэтыя дні ідзе пошук 17 грыбнікоў. Палову з іх шукаюць ужо больш за 10 дзён. Акрамя таго, сёння СК разам з іншымі прадстаўнікамі сілавога блока, уключаючы расійскіх калег, абмеркавалі і тэму раскрыцця злачынстваў мінулых гадоў. І хоць за апошнія гады колькасць нераскрытых спраў скарацілася ўдвая, але іх яшчэ досыць - каля 175 000. Тры чвэрці з іх - крадзяжы плюс цяжкія і асабліва цяжкія злачынствы. Як падкрэсліў Іван Наскевіч, неабходна і далей удасканальваць методыку працы ў гэтым кірунку.