Зрэшты, каб зімовыя традыцыі і забавы прыносілі толькі добрыя эмоцыі без наступстваў, галоўнае - выконваць рэкамендацыі і простыя правілы бяспекі. Гэта тычыцца і папулярнай апошнім часам забавы - катання на цюбінгах.
У Гродне, каб не дапусціць выпадкаў траўміравання дзяцей, праводзяцца рэйды па ўсіх ледзяных горках горада. Супрацоўнікі міліцыі, работнікі школ і мясцовых адміністрацый аб'язджаюць стыхійныя месцы актыўнага адпачынку гараджан і растлумачваюць правілы катання на санках і цюбінгах. А ў выпадку неабходнасці агароджваюць патэнцыяльна небяспечныя ўчасткі. Вынікі рэйду ў рэпартажы Юрыя Карняловіча.
Сустрэць супрацоўнікаў праваахоўных органаў разам з настаўнікамі і прадстаўнікамі мясцовых адміністрацый у Гродне можна практычна на любой, нават самай невялікай горцы, дзе катаюцца дзеці. Падчас прафілактычнага маніторынгу спецыялісты чарговы раз нагадваюць аб правілах бяспечнага зімовага адпачынку.
Такая павышаная ўвага да актыўнага адпачынку гараджан звязана з больш частымі выпадкамі траўміравання дзяцей на ледзяных горках. У гэтай сувязі найбольш небяспечныя месцы агароджваюцца спецыяльнымі стужкамі, устанаўліваюцца папераджальныя таблічкі.
Усачыць за ўсімі, прызнаюцца праваахоўнікі, практычна немагчыма. Бо ў кожным мікрараёне, дзе ёсць нават невялікая снежная горка, за выхадныя бываюць некалькі сотняў чалавек. І тут на дапамогу прыходзяць школы, дзе з кожным вучнем праводзяцца заняткі па правілах бяспечнага зімовага адпачынку.
10-гадовы Андрэй з сябрамі на горцы праводзіць увесь вольны час. Добра, што яна ўсяго за 20 крокаў ад дома. Дзеці самі сабе пракладваюць трасы рознай складанасці. Прызнаюцца, самы круты спуск пакуль абыходзяць, бо правілы бяспечных паводзін засвоілі добра.
Каб накіраваць стыхійны зімовы адпачынак у бяспечнае рэчышча, ва ўсім рэгіёне арганізоўваюцца спецыяльныя зімовыя пляцоўкі.
Адзіным афіцыйна дазволеным месцам для катання на цюбінгах у Гродне з'яўляецца парк актыўнага адпачынку "Каробчыцкі алімп". Тут абсталяваны спецыяльныя трасы, а за бяспекай сочаць прафесійныя інструктары.
З пачатку сезона ў парку адпачылі больш за 4 тысячы чалавек. Акрамя так папулярных гумовых ватрушак, юныя гродзенцы асвойвалі спускі на лыжах і снаўбордах. Кантроль за стыхійнымі катаннямі на імправізаваных гарадскіх горках будзе прадоўжаны да канца сезона.
