Антуражныя пешыя гайды, аглядныя бас-туры і маляўнічыя аквамаршруты - такія нестандартныя фарматы экскурсій прапануюць гараджанам і гасцям Мінска. Адзін з правераных - на гарадскім двухпавярховым аўтобусе. На маршруце праз цэнтр знаёмства з помнікамі архітэктуры, паркамі і скверамі. Інфармацыю можна паслухаць на беларускай, рускай, англійскай, нямецкай, французскай, іспанскай, італьянскай і кітайскай мовах.
Выбраць маршрут можна ў новым інфармацыйна-турысцкім цэнтры "Мінск" у падземным шопінг-моле "Сталіца". Тут дапамогуць падабраць тур па неабходных крытэрыях.
Пра гістарычную спадчыну Мінска можна даведацца ў Верхнім горадзе. Стартуе прагулка ад Ратушы: усяго за некалькі гадзін пакажуць самыя атмасферныя старадаўнія вулачкі. На пейзажы беларускай сталіцы можна палюбавацца і з вады: у гэтым сезоне адкрыюць акваэкскурсіі на параходзе па Свіслачы.