Праблема, якая часам патрабуе ўвагі кантралюючых органаў, - гэта студэнцкія сталовыя. Свой рэйд па такіх пунктах харчавання не раз рабілі і карэспандэнты Агенцтва тэленавін. Гэтым разам у поле зроку трапіў інтэрнат сельгасакадэміі ў Горках. Тут ужо больш за месяц не працуе буфет. А гэта адзіны пункт харчавання, дзе можна было паўнавартасна паесці да 7 вечара. Закрылі са словамі - не рэнтабельна. Між тым, ужо ў БДУ прапаноўваюць рашэнне ў такіх выпадках. Цэнтр інтэлектуальнай уласнасці ўніверсітэта распрацаваў спецыяльную праграму. Якую - даведалася Анастасія Бенедзісюк.
Менавіта БДУ яшчэ 16 гадоў назад стаў першай беларускай ВНУ, якая ўкараніла ў навучальны працэс электронны студэнцкі білет. Пройдзе 7 гадоў і без яго не зможа абысціся ўжо ні адзін універсітэт. А БДУ пойдзе далей - гэты навучальны год тут пачнуць з таго, што 5 тысячам першакурснікаў і магістрантаў выдадуць абноўлены студэнцкі, зараз ён сумешчаны з банкаўскай карткай. І вось некалькі дзён новага года, і па ім ужо можна аплачваць абеды ў студэнцкай сталовай.
Для чаго гэта трэба? Па-першае, так зручней для саміх студэнтаў, а па-другое, гэтая разумная тэхналогія дазволіць адсочваць і пры неабходнасці карэктаваць сітуацыю ў сталовых. Што паеў, на колькі, у якім менавіта пункце грамадскага харчавання? - уся інфармацыя ў рэжыме рэальнага часу паступае ў Цэнтр інфармацыйных тэхналогій
А гэта ўжо Горкі. Тут палічылі за лепшае пералічыць студэнтаў на ўваходзе, не паглыбіўшыся ў прычыны нізкай наведвальнасці. 35 за дзень, у лепшым выпадку - канстатуе прарэктар па выхаваўчай працы. Зрэшты, галоднымі студэнты не ходзяць. На тэрыторыі студгарадка працягваюць працаваць 4 буфеты, дзе можна купіць салату і другое, і столькі ж гандлёвых пунктаў з булачкамі і кавай. Вось толькі закрытае кафэ працавала на гадзіну даўжэй.
Ёсць яшчэ сталовая. За сотню метраў ад інтэрната. Менавіта туды перавязуць абсталяванне закрытага буфета. Гэты пункт харчавання працуе да 18. Зрэшты, у рэктараце гатовы ісці на кампраміс.
Андрэй Калмыкоў, першы прарэктар Беларускай дзяржаўнай сельскагаспадарчай акадэміі: "У перыяды сесіі, калі ў акадэміі апроч студэнтаў вочнай формы навучання знаходзяцца студэнты завочнікі, мы разлічваем колькасць студэнтаў і адпаведна з улікам гэтага праводзіцца анкетаванне па неабходнасці. З улікам гэтага мяняем графік працы. У прынцыпе сталовая можа працаваць у нас і не толькі да 18:00, да 19 і нават да 20. У нас ёсць прафсаюз студэнтаў, які кантралюе таксама гэтае пытанне. Ёсць прадстаўнікі студэнцтва, якія курыруюць работу пунктаў харчавання ў акадэміі, і мы ўсе гэтыя пажаданні ўлічваем".
На месцы закрытага буфета адкрыюць міжнародны цэнтр, дзе замежнікі (а іх у акадэміі каля паўтысячы) будуць праводзіць культурныя вечары і нават кулінарныя батлы.
Тым часам у БДУ тэхналогіі ўжо дайшлі да двух кафэ і сталовай галоўнага корпуса. На чарзе яшчэ 23 пункты харчавання па ўсім універсітэце. І, нягледзячы на сесію і канікулы, заўважае касір, штодня мінімум з дзясятак чалавек прыкладваюць студэнцкі да спецабсталявання. І ўжо пасля самастойна выбіраюць варыянт аплаты: наяўнымі або электронным дакументам.
Што да сацыяльных скідак. На іх у будучыні змогуць разлічваць усе студэнты ўніверсітэта - толькі прыкладзі электронны дакумент (усё-такі часцяком кліентамі студэнцкіх сталовых становяцца людзі, якія ўжо даўно атрымалі дыплом, што працуюць побач). Аб памеры скідкі - паведамяць пазней. Але галоўнае - інтэлектуальнай уласнасцю ў БДУ гатовы дзяліцца.
