Не толькі прапанаваць работу, але і заахвоціць застацца. Як гэта зрабіць, дакладна ведаюць у Лагойскім раёне. Працаўладкаванню маладых спецыялістаў тут надаюць вялікую ўвагу. Тым самым вырашаюць праблему дэфіцыту кадраў. А яна для Мінскай вобласці застаецца актуальнай. Толькі ў сферы адукацыі найбольш не хапае настаўнікаў замежнай мовы, матэматыкі, фізікі і выхавацеляў. Як рыхтуюцца ў рэгіёне да сезона размеркавання маладых спецыялістаў, раскажа Наталля Кезік.
На яго адказнасці 40 адзінак тэхнікі - грузавыя і легкавыя аўто. Малады інжынер-механік Сяргей Шумскі павінен штодзень заказваць запчасткі, выпісваць пуцёўкі і даваць заданне механікам. На сваім першым працоўным месцы - са жніўня. Ва ўніверсітэт адразу паступаў па мэтавым накіраванні.
У гэты сельскагаспадарчы комплекс штогод прыходзяць маладыя спецыялісты. Дырэктар і сёння памятае, як сам больш за 20 гадоў таму трапіў сюды таксама па размеркаванні.
Сёлета ў сельскую гаспадарку працаваць прыехалі толькі шэсць чалавек. Больш за ўсё ў раёне зараз маладых медыкаў, педагогаў і работнікаў спажывецкай кааперацыі.
Летась на працу ў Лагойскі раён прыехалі 117 маладых спецыялістаў. Першапачаткова ім прапаноўваюць месца ў інтэрнаце. З часам маладыя спецыялісты могуць атрымаць жыллё – уласную кватэру альбо ўчастак для будаўніцтва дома.
Яўген Зуб свой участак набыў амаль адначасова са статусам “малады спецыяліст”. Пакуль паспеў толькі заліць фундамент на ўчастку. У планах за лета – пабудаваць сцены і накрыць дах. З жонкай яны дакладна вырашылі – дом будзе двухпавярховы.
Згодна са статыстыкай, 98% маладых спецыялістаў застаюцца ў Лагойскім раёне. За два гады абавязкова атрымліваюць жыллё. Больш за тое, раённыя ўлады зразумелі і карысць мэтавага размеркавання – прывабліваць патэнцыяльных работнікаў яны пачынаюць у старэйшых класах. Колькі сёлета маладых спецыялістаў прыедзе на працу ў раён, пакуль дакладна невядома. Пры гэтым цяжка вызначыць, спецыялістаў якога профілю тут больш за ўсё не хапае – маладыя кадры тут чакаюць ва ўсіх сферах.
