Больш за 800 абітурыентаў не адважыліся прыйсці на іспыт па беларускай мове. Напярэдадні спецыяльная камісія падвяла вынікі правядзення ЦТ па першым прадмеце. Ужо падчас выпрабавання аўдыторыю пакінулі яшчэ 4 чалавекі. Двое з іх па стане здароўя, ім прапанавана прайсці тэст у рэзервовы дзень - 2 ліпеня. Яшчэ два чалавекі - у Маладзечне і Брэсце - былі выдалены з аўдыторыі за наяўнасць мабільнага тэлефона.
І сёння прайшло яшчэ адно выпрабаванне - па рускай мове. На гэты прадмет была зарэгістравана найбольшая колькасць абітурыентаў - звыш 75 тысяч. Наступны іспыт ужо ў гэту сераду па грамадазнаўстве.
