Іаган Себасцьян Бах адсвяткаваў дзень нараджэння ў сталічнай падземцы. Сёння ў гонар юбілею вялікага кампазітара яго творы гучалі ў пераходах метрапалітэна. Шматлікія меламаны спяшаліся ад адной станцыі да другой, каб паспець паслухаць класіку ў выкананні розных інструментаў.
Музычныя шэдэўры ў падземнай акустыцы пачула Іна Пілевіч. На гэтым канцэрце артыстам дазволена не прытрымлівацца дрэс-кода. Замест фракаў і сукенак у пол надзелі цёплыя світары, курткі, шапкі і шалікі. Бо на імправізаванай сцэнічнай пляцоўцы вулічная тэмпература і скразнякі. Сёння прафесійныя інструменталісты ігралі Баха ў пераходах метро. З дня нараджэння кампазітара - 330 гадоў.
Цымбалы на "Плошчы Перамогі", баян - на "Пушкінскай", ударныя - на "Плошчы Якуба Коласа". Паслухаць класіка даступна ў пераходах кожнай з ветак мінскага метро. Музычнымі сталі адразу 10 станцый. Інструменты падбіраліся з улікам асаблівасцяў пераходу. Чым шматлюдней, тым гучнейшая музыка.
Баха выконваюць у пераходах без расчыненых футаралаў і перавернутых капелюшоў. Музыканты наўмысна не прымаюць грошы за свае выступленні, але, тым не менш, не адмаўляюцца ад кветак і апладысментаў. Інакш выкананне можа стаць нелегальным канцэртам.
На выступленне ў пераходзе кожны інструменталіст, можна сказаць, атрымаў гастрольнае пасведчанне. Мерапрыемства ўзгоднена з Мінкультам, гарвыканкамам і метрапалітэнам. Праект не з'яўляецца камерцыйным, уваход на падземны канцэрт бясплатны.
Сярод артыстаў - салісты філармоніі, студэнты Акадэміі музыкі. Згодна з рэгламентам, творы нямецкага кампазітара ігралі роўна гадзіну - з 15 да 16 гадзін. Працяг юбілею Баха - у касцёле Святога Роха, дзе ўжо класіку можна пачуць у выкананні арганістаў.
