Вядома, вельмі сімвалічна, што і для служыцеля царквы важна аддаць даніну памяці загінуўшым у Вялікай Айчыннай. Сапраўдная памяць, як і вялікая царкоўная падзея, якая адбылася сёння, аб'ядноўваюць народ.
Жывых сведак той вайны, якія маглі б распавесці сваю гісторыю, на жаль, засталося не так шмат. Але нам як журналістам на гэтым тыдні вельмі пашанцавала. Карэспандэнты АТН сустрэліся і запісалі сапраўды эксклюзіўнае інтэрв'ю з жанчынай-легендай, удзельніцай наступальнай аперацыі "Баграціён" 1944 года, лётчыцай знакамітага жаночага авіяпалка "Начныя ведзьмы" Галінай Брок-Бяльцовай.
У гэтыя дні яна гасцюе ў нас, у Мінску. У Ліпках адбыўся гістарычны момант - прэзентацыя ўзноўленага самалёта, на якім ляталі непераможныя "Начныя ведзьмы" падчас вызвалення Беларусі. Галіне Паўлаўне зараз 92 гады. Але яе жыццёвай энергіі, сіле духу і аптымізму можна пазайздросціць.
Надзея Сербіненка сустрэлася з жанчынай-легендай. Інтэрв'ю са штурманам пікіруючага бамбардзіроўшчыка Галінай Брок-Бяльцовай - эксклюзіў "Галоўнага эфіру".
Галіна Брок-Бяльцова. 92 гады. Нарадзілася ў Маскве. Трапіла на фронт у 18 гадоў. Адзіная цяпер жанчына - штурман пікіруючага бамбардзіроўшчыка Пе-2. Служыла ў легендарным жаночым авіяпалку Марыны Раскавай, якому далі мянушку "Начныя ведзьмы". Удзельніца аперацыі па вызваленні Беларусі ў 1944 годзе "Баграціён". За вайну здзейсніла 36 вылетаў. Мае пяць баявых узнагарод. Скончыла МДУ. Выкладала гісторыю 60 гадоў.
Працоўны графік Галіны Паўлаўны распісаны літаральна па днях - і на месяцы наперад. Сустрэчы з моладдзю праходзяць па ўсёй Расіі. Часта лятае і за мяжу. Штурмана легендарнага жаночага авіяпалка запрашаюць выступіць на розных пляцоўках. І яе шаноўны ўзрост выдаюць толькі медалі і ордэны на грудзях.
Без сарамлівасці, абсалютна адкрыта размаўляе і з журналістамі. Ужо не раз Галіна Паўлаўна станавілася ўдзельніцай ток-шоу на расійскім тэлебачанні. Дзясяткі рэпартажаў, сотні інтэрв'ю, нязменны ўдзел у парадах 9 Мая на Краснай плошчы. Не выпусцілі магчымасці пагутарыць з жывой легендай і карэспандэнты "Галоўнага эфіру". На абноўленым аэрадроме Ліпкі сустракаем Галіну Паўлаўну. Як заўсёды, у суправаджэнні моладзі.
З Масквы ў беларускую сталіцу экс-лётчыца прыбыла па запрашэнні кіраўніка мінскага аэраклуба ДТСААФ Мікалая Мачанскага. Спецыяльна да прыезду Галіны Пятроўны быў пададзены самалёт Пе-2. Той самы, на якім ляталі непераможныя "Начныя ведзьмы" падчас вызвалення Беларусі.
У Ліпках экс-лётчыца сустрэлася з будучымі лётчыкамі, курсантамі авіяфакультэта Ваеннай акадэміі Беларусі. У хлопцаў было шмат пытанняў да Галіны Паўлаўны, бо аб яе подзвігах яны чыталі толькі ў падручніках.
А вось параўнаць авіятэхніку свайго часу і апошняга пакалення штурмавік Галіна Паўлаўна змагла нават не з зямлі, а ў паветры.
На памяць аб сустрэчы курсанты авіяфакультэта падарылі свайму куміру юбілейны нагрудны знак. Зараз і беларускі арнамент заняў важнае месца на грудзях жанчыны-авіятара.
