Байкерскі сезон яшчэ і не адкрыўся, а ў зводках Дзяржаўтаінспекцыі - аварыі з удзелам матацыклістаў. У сталіцы толькі за апошнія дні адбылося два сур'ёзныя дарожна-транспартныя здарэнні. Загінулі двое - байкер і яго пасажыр. Яшчэ адзін уладальнік матацыкла з траўмамі рознай цяжкасці шпіталізаваны. Інспектары ДАІ праводзяць рэйды па зніжэнні колькасці аварый з удзелам матацыклістаў. З падрабязнасцямі - Аляксандр Харавец.
Кадры гэтай жудаснай аварыі на Лагойскім тракце абляцелі Байнет за лічаныя гадзіны. Як высветлілася, вадзіцель маршрутнага таксі пры павароце налева не прапусціў матацыкліста. У выніку транспартныя сродкі сутыкнуліся і загарэліся. Байкер і яго пасажыр загінулі на месцы. Вадзіцель маршруткі і яго пасажыры сур'ёзна не пацярпелі.
У яшчэ адной аварыі з удзелам матацыкліста - зноў канфлікт левага павароту. На гэты раз байкер не падзяліў дарогу з вадзіцелем тралейбуса. У выніку ўладальнік двухколага з адкрытым пераломам бядра шпіталізаваны. Ад сур'ёзных траўмаў яго абараніў трывалы шлем.
Руслан Грэль за рулём матацыкла каля 20 гадоў. Мужчына прызнаецца, некалькі разоў трапляў у сур'ёзныя ДТЗ - у тым ліку і па ўласнай віне. Адмовіцца ад драйву ўсё роўна не можа. Толькі цяпер стараецца прытрымлівацца правілаў дарожнага руху.
Аднак не ўсе байкеры выкідваюць адрэналін на закрытых пляцоўках. Некаторыя матацыклісты рэзкія манеўры робяць на вуліцах горада. Паводле слоў Сяргея Чугунова, часта гэта нявопытныя вадзіцелі. Мотаінструктар канстатуе, многія будучыя байкеры ў аўташколу прыходзяць толькі па вадзіцельскае пасведчанне, а не па веды.
Каб зменшыць аварыйнасць на дарогах з удзелам мотатэхнікі, ДАІ праводзіць спецыяльныя рэйды. Асаблівая ўвага - байкерам. Паводле слоў дарожных міліцыянераў, усплёск ДТЗ з удзелам матацыклістаў вясной - хутчэй сумная традыцыя. Таму да парушальнікаў правіл будуць прымяняць самыя жорсткія меры.
Вадзіцелям аўто інспектары ДАІ таксама раяць павысіць увагу на дарогах і часцей глядзець у люстэрка задняга віду, каб своечасова заўважыць матацыклістаў.
Інспектары ДАІ нагадваюць, кіраваць матацыклам і перавозіць пасажыраў неабходна толькі ў шлемах. Акрамя таго, каб прыцягнуць да сябе ўвагу на дарозе, байкерам рэкамендуюць рухацца з пастаянна ўключаным блізкім святлом фар.
Таксама ўладальнікам мотатэхнікі неабходна паклапаціцца аб своечасовай рэгістрацыі транспартных сродкаў і праходжанні тэхагляду. Нагадаем, афіцыйнае адкрыццё мотасезона стартуе 16 красавіка.
