Сёлета ўжо каля сотні дамоў сталіцы маюць такую магчымасць дзякуючы рэзервовым сістэмам водазабеспячэння. Пра водныя эксперыменты даведаліся нашы карэспандэнты.
Расказвае Андрэй Козел: Прыняць ванну, памыць посуд і рэчы... Электрачайнік у гэтай кватэры за апошнія 11 дзён амаль што не выключаецца. Камунальнікі абяцаюць ужо хутка даць гарачую ваду, а ў гаспадыні ўжо хутка здадуць нервы. Прызвычаіцца да спартанскіх умоў Настасся не можа да гэтага часу.
Падчас гідраўлічных выпрабаванняў ціск у трубаправодах павышаецца аж да 20 атмасфер. Гэта і ёсць галоўная прычына, з якой адключаюць жыхароў ад сістэмы: кватэрнае абсталяванне на такі ціск не разлічана.
Каб падрыхтаваць цепласетку да 30 жніўня, трэба як мага хутчэй вызначыць пашкоджаныя ўчасткі і выправіць максімальную колькасць дэфектаў. У некаторых выпадках трэба разбураць асфальт, капаць і нанова класці тратуарную плітку. Таму працы ў мінскіх камунальнікаў на два тыдні больш чым дастаткова.
Працаўнікі Мінсккамунцепласеткі знайшлі спосаб, як пазбегнуць адключэння гарачай вады. Невялічкія кацельні ў перыяд адключэння асноўнай сістэмы возьмуць забеспячэнне квартала на сябе. Такія рэзервовыя сістэмы ўжо абслугоўваюць 93 дамы ў раёне вуліц Валадажскага і Панамарова. Дарэчы, на 13 аб'ектах гарачая вада адсутнічала ўсяго каля 5 часоў.
Распаўсюджваць новыя тэхналогіі плануюць і ў іншых раёнах Мінска. Трэба толькі рэканструяваць старыя кацельныя, перакласці трубаправоды і замяніць сеткі. Аднак аб'екты, далучаныя да цэнтралізаванага цеплазабеспячэння Мінскэнерга, такой магчымасці мець не будуць, пакуль прадпрыемства не пройдзе рэканструкцыю і не зменіць старое абсталяванне.
