Праца па ўзгадненні графіка руху цягнікоў ва Украіну носіць выключна тэхнічны характар. Пра гэта сёння журналістам заявіў начальнік Беларускай чыгункі Уладзімір Марозаў. Нагадаем, напярэдадні было заяўлена, што з 27 мая продаж білетаў на цягнікі ва Украіну, а таксама транзітам праз яе, будзе прыпынены. Як растлумачылі ў галоўным чыгуначным ведамстве нашай краіны, Украіна вырашыла змяніць расклад руху асобных цягнікоў па ёй тэрыторыі, гэта і выклікае змяненне міжнародных маршрутаў у цэлым.
Уладзімір Марозаў, начальнік Беларускай чыгункі: Па ініцыятыве Савета па чыгуначным транспарце і ўкраінскіх чыгунак плануецца сустрэча экспертаў, упаўнаважаных прадстаўнікоў адміністрацыі для ўзгаднення графіка руху цягнікоў. Аб прынятым рашэнні і новым раскладзе мы адпаведна праінфармуем насельніцтва. Цэнавая палітыка білетаў не зменіцца. Яна прадугледжана ў адпаведнасці з міжнароднымі дагаворамі.
І як адзначылі ў ведамстве, зараз рух пасажырскіх і грузавых цягнікоў ва ўкраінскім кірунку праходзіць у штатным рэжыме. Новы графік плануецца ўвесці з 1 ліпеня. Ужо вядома, што паміж Беларуссю і Украінай будзе курсіраваць 16 пасажырскіх цягнікоў. Транзітам праз краіну-суседку прадугледжаны 4 цягнікі паўднёвага кірунку.