Новы праспект, 6-палосная дарога, развязка, амбулаторыя і сучасны жылы дом, пабудаваны па новай сістэме фінансавання. Свой юбілей Гродна адзначае з размахам. 889 гадоў горад адсвяткуе ў гэтую суботу, але сюрпрызы ўжо пачаліся. Вялікі праспект імя Героя Савецкага Саюза Івана Лебедзева разам з аўтаразвязкай палепшыць жыццё ў новым мікрараёне.
Мечыслаў Гой, старшыня Гродзенскага гарвыканкама: "Гэта самы малады мікрараён, і мы бачылі самыя вялікія праблемы ў гэтым плане - гэта, у першую чаргу, праезд да асноўнага горада, да цэнтральнай часткі з мікрараёна. Гэта было нязручна, людзі карысталіся сваім транспартам і грамадскім, і з уводам гэтай дарогі ўсе гэтыя праблемы знікнуць".
Сёння ж афіцыйна адкрылі і амбулаторыю ў Гродне. Установа знізіць ажыятаж сярод жыхароў. Да канца тыдня гораду падораць новы футбольны манеж і, вядома, вялікае забаўнае шоу.
