У Брэсце сёння ўсё больш звярталі ўвагу на зямлю. З-за праліўных дажджоў мясцовым аграрыям прыходзіцца карэкціраваць свае планы. Пытанне гэтае настолькі маштабнае, што гучала нават у адзіны дзень інфармавання, калі звычайна пытаюцца пра іншае - пра ЖКГ, будаўніцтва або, напрыклад, тэлебачанне, як сёння ў прысутнасці кіраўніка Белтэлерадыёкампаніі. Зрэшты, тэлебачанне - гэта ўжо даўно не проста забава. Часам журналісту тэлефануюць адразу пасля чыноўніка, каб аб праблемах стала чуваць.
Так што Генадзя Давыдзьку сёння пыталіся пра ўсё, разлічвалі не толькі на разуменне, але і на аўтарытэт.
З падрабязнасцямі Вікторыя Патоня. На гэтых кадрах, зробленых з верталёта, добра відаць: так сёння выглядаюць лугі і палі Палесся. Столінскі, Лунінецкі, Пінскі раёны нагадваюць Венецыю. Амаль штодзённыя праліўныя дажджы ўплываюць на касьбу травы, рост сельгаскультур і на ўраджай.
Канстанцін Сумар, старшыня Брэсцкага аблвыканкама: У нас ёсць землі, якія з вясны мы не змаглі засеяць. Гэта першае. Другое - вельмі шмат залітых пасеваў. Немагчыма траву скасіць дагэтуль. Гэта тая праблема, ад якой пакутуе эканоміка.
Праз лічаныя дні камбайны выйдуць у палі на ўборку азімага ячменю. Зрэшты, умовы надвор'я адкарэкціравалі метады працы. У Брэсцкай вобласці затопленыя больш чым 20 тысяч гектараў палёў. Плошча параўнальная з цэлым раёнам.
Аляксей Трацюк, намеснік старшыні камітэта па сельскай гаспадарцы і харчаванні Брэсцкага аблвыканкама: Трэба будзе праводзіць асобныя мерапрыемствы, паэтапна ўбіраць плошчы. Дадаткова прыйдзецца адшукваць рэсурсы на сушэнне, на паліва.
Мікалай Ашмянцаў, намеснік дырэктара РУП Беларуснафта-Брэстаблнафтапрадукт: Мы поўнасцю забяспечаныя палівам. І ўсе нашы нафтабазавыя гаспадаркі гатовыя запатрабаванні нашых сельскагаспадарчых вытворцаў забяспечыць у поўным аб'ёме.
Экстрэмальная сітуацыя, у якой знаходзіцца брэсцкае Палессе, не засталася без увагі галоўнага тэлевізіёншчыка краіны. Старшыня Белтэлерадыёкампаніі падкрэслівае: у гэтым і заключаецца асноўная функцыя тэлебачання - узнімаць праблемы і прапаноўваць варыянты іх вырашэнняў.
Генадзь Давыдзька, Старшыня Белтэлерадыёкампаніі: Задавальненне ад зносінаў ёсць, і адказнасць узрастае перад нашымі тэлегледачамі, перад беларускім грамадствам, таму што ніхто проста так хлеб свой не здабывае. Усе працуюць у поце чала. І нам трэба больш працаваць.
Генадзь Давыдзька запэўніў: у эфірнай сетцы каналаў Белтэлерадыёкампаніі заўсёды знойдзецца час і месца для самых надзённых тэм. І кожны глядач, націскаючы першую кнопку, мае права разлічваць на самае цікавае, актуальнае і праўдзівае.
