Стаць больш прыкметным на дарозе дзеля асабістай бяспекі. Да гэтага заклікаюць супрацоўнікі ДАІ. Апошнія дні пачасціліся выпадкі ДТЗ з удзелам пешаходаў.
Самае простае правіла - пазначыць сябе флікерам, каб вадзіцелі загадзя заўважылі таго, хто ідзе ў цёмны час сутак уздоўж трасы ці пераходзіць дарогу па нерэгулюемым пераходзе. У найбліжэйшыя дні дарожныя міліцыянеры ўзмоцняць кантроль за пешаходамі, у тым ліку паблізу школ і ў дварах. Правераць і выкарыстанне вадзіцелямі блізкага святла фар у цёмны час сутак. Правілы зімовага рэжыму на дарогах у Ільі Цвяткова.
Дарога ад дома да школы для Арсенія Герасімовіча добра знаёмая. Але нават на звыклым маршруце часам могуць здарацца непрадказальныя сітуацыі, а значыць пільнасць і ўвага не будуць лішнімі. Таму маці Яўгенія час ад часу праводзіць для сына дадатковы ўрок бяспекі - вучыць Арсенія асновам дарожнай граматы.
Супрацоўнікі Дзяржаўтаінспекцыі звяртаюць увагу, што самае простае правіла бяспечнага дарожнага руху, асабліва ў цёмны час сутак і ў непагадзь, - стаць больш прыкметным. На гэтым тыдні інспектары правераць маленькіх і дарослых пешаходаў на ўменне арыентавацца на дарозе ў цёмны час сутак. Дарожныя міліцыянеры з самага ранку будуць дзяжурыць каля навучальных устаноў, а таксама паблізу ажыўленых пешаходных пераходаў.
Мікалай Гулевіч, інспектар ДПС АДАІ Маскоўскага РУУС г. Мінска: "У сувязі з тым, што хутка чакаецца выпадзенне ападкаў у выглядзе мокрага снегу і дажджу, пешаходам трэба быць максімальна ўважлівымі пры пераходзе пешаходных пераходаў, бо дарожнае пакрыццё будзе ўжо зусім іншым".
У складанай дарожнай сітуацыі пешаходу і аўтааматару лепш убачыць адзін аднаго загадзя. Вось тут і патрэбны флікеры на вопратцы, сумках і рукзаках. Пры ўключаных блізкіх фарах святлоадбівальныя элементы можна заўважыць за 400 метраў. Вадзіцелю гэтага дастаткова, каб своечасова зрэагаваць.
Правільнае выкарыстанне светлавых прыбораў і захаванне хуткаснага рэжыму з боку вадзіцеляў не з'яўляецца гарантыяй бяспекі на праезнай частцы. Ні тым, хто знаходзіцца за рулём, ні тым, хто па той бок, не варта забываць пра так званыя дарожныя пасткі, у якія трапляюць вадзіцелі і пешаходы. Часцей за ўсё гэта адбываецца каля пешаходных пераходаў.
Пасткамі супрацоўнікі ДАІ называюць сітуацыі, калі пешахода, які ступіў на зебру, складана заўважыць з-за прыпаркаваных не па правілах аўто.
За сітуацыяй каля нерэгулюемых пешаходных пераходаў асаблівы кантроль. У першы раз парушальнікі могуць абмежавацца папярэджаннем. Пры паўторным парушэнні аўто эвакуіруюць на штрафстаянку, а вадзіцелю прыйдзецца заплаціць 25 рублёў.
ДАІ заклікае стаць больш прыкметным на дарозе дзеля асабістай бяспекі
19 ноября 2019