Паклапаціцца аб уласнай бяспецы і змяніць летнюю гуму на шыны па надвор'і заклікаюць аўтааматараў супрацоўнікі ДАІ. У нашу краіну ідзе сапраўдная зіма. Ужо гэтай ноччу слупкі тэрмометраў у некаторых рэгіёнах апусцяцца да мінус 11. А да сярэдзіны тыдня ўшчыльную наблізяцца і да адзнакі мінус 20. З 1 снежня і да 1 сакавіка зімовыя шыны абавязковыя. За парушэнне пагражаюць штрафы. Зрэшты, аплаціць квітанцыю ад супрацоўніка ДАІ - гэта яшчэ лёгка абысціся, гавораць бывалыя вадзіцелі. Бо наступствы язды на жалезных конях у абутку не па сезоне могуць быць больш сумнымі. У чым пераканаўся Аляксандр Харавец.
Летняя гума, слізкая дарога, небяспечная хуткасць, намець, сустрэчная паласа, лабавое сутыкненне... Чацвёра траўміраваных пасажыраў і адзін смяротны зыход. Гэта вынік ранішняй аварыі ля вёскі Баравая ў Бабруйскім раёне. Што менавіта стала прычынай смяротнага ДТЗ - высвятляюць следчыя. Але калі б вадзіцель недарожніка своечасова пераабуўся, не выключана, што аварыі можна было б пазбегнуць.
Дзмітрый Шчурскі сёння ледзь не трапіў у аварыю. Таму ўсе справы адклаў на потым і адразу на шынамантаж.
Дарэчы, стаяць у чарзе на шынамантажах гэтымі днямі не прыйдзецца. Па словах спецыялістаў, пік пераабування аўто прыпаў на сярэдзіну лістапада. Што да кошту, то ён у розных пунктах прыкладна аднолькавы.
Штраф за адсутнасць на колах зімовай гумы можа дасягнуць дваццаці чатырох з паловай рублёў. Аднак з кожным годам колькасць вадзіцеляў, якія не пераабуваюць аўто, значна зніжаецца. І не столькі з-за пагрозы пакарання, колькі дзеля бяспекі.
Чым небяспечная слізкая дарога, ведаюць не толькі вадзіцелі. Нават у пешахода ў летнім абутку каэфіцыент счаплення з тратуарам памяншаецца ў некалькі разоў. І каб чалавеку спыніцца, трэба трохі паслізгацца. Што гаварыць пра аўтамабіль. Эксперты канстатуюць: пры хуткасці 60 кіламетраў за гадзіну на летняй гуме тармазны шлях легкавой машыны складае каля 80 метраў. У той жа час на зімовай амаль у два разы меншы.
Пра наступствы язды зімой на летняй гуме нагадваюць і дарожныя міліцыянеры.
Ды і само надвор'е падштурхоўвае вадзіцеляў перайсці на зімовы манер язды. Ужо гэтай ноччу слупкі тэрмометраў апусцяцца да мінус 10. А з сярэдзіны тыдня ў краіну прыйдзе сапраўдная зіма.
Да канца тыдня маразы аслабеюць і заснежыць. На дарогах магчымыя намеці і галалёдзіца. Так што пакуль яшчэ ёсць трохі часу, каб пераабуцца і не паслізнуцца на трасе.
