Фотавыстава аб найважнейшых вехах гісторыі суверэннай Беларусі адкрылася ў Палацы Незалежнасці. Фатаграфіі ў асноўным ахопліваюць апошнія 2 дзесяцігоддзі з жыцця беларускай дзяржавы.
На здымках важныя палітычныя падзеі як рэспубліканскага, так і міжнароднага маштабу, знакавыя нацыянальныя праекты. Выстава непарыўна звязана і з дзейнасцю Прэзідэнта Беларусі Аляксандра Лукашэнкі. На гістарычных кадрах захаваны сустрэчы з вядомымі палітычнымі і культурнымі дзеячамі, фатаграфіі з асабістага архіва беларускага лідара, рабочыя паездкі па краіне, у тым ліку наведванне тэрыторый, пацярпелых ад аварыі на Чарнобыльскай АЭС. Побач здымкі, зробленыя падчас уборачнай кампаніі ў розныя гады. З экспазіцыяй сёння азнаёміўся і Кіраўнік дзяржавы.
Цэнтральнае месца ў экспазіцыі займае фатаграфія Аляксандра Лукашэнкі падчас інаўгурацыі ў Палацы Незалежнасці ў лістападзе 2015 года. Побач з ёй кадры ўдзелу ў парадзе да Дня Незалежнасці. Тут жа змясцілі здымкі сустрэч з Патрыярхам Кірылам і Папам Рымскім Францыскам. Фотавыстава адлюстроўвае і шматвектарную палітыку Беларусі, яе актыўны ўдзел у глабальных сусветных працэсах. Гэта і кадры з самітаў ААН, АБСЕ, СНД, Шанхайскай арганізацыі супрацоўніцтва, АДКБ, форуму "Адзін пояс - адзін шлях", сустрэчы ў Мінску лідараў краін "нармандскай чацвёркі". Стваральнікі выставы не абышлі бокам і захапленне Прэзідэнта спортам. Можна ўбачыць Кіраўніка дзяржавы падчас хакейнага матча, на лыжні, падчас сустрэчы каманды ветэранаў футбола і студэнцкай зборнай.
