Адразу на двух сельгаспрадпрыемствах зафіксаваныя выпадкі гібелі жывёл. Як стала вядома, яны не атрымлівалі неабходнага харчавання. У выніку - загінуўшых жывёл недалёка ад вёскі звальвалі ў яму. Паводле ацэнак спецыялістаў дзяржкантролю, сума шкоды перавысіла мільярд рублёў. Больш падрабязна - Аляксей Немаў.
Гэтыя фатаграфіі зрабілі мясцовыя жыхары. Абуральныя факты безгаспадарлівасці на тэрыторыі "Акцябрскі-Агра" не проста абураюць вяскоўцаў. Людзі гавораць, гэтаму няма апраўданняў.
Факты гібелі цялятаў кіраўніцтва сельгаспрадпрыемства не ўтойвае. Гавораць, кармоў не хапае. Жывёлы слабыя, хварэюць, паміраюць.
Аб парадку на малочным комплексе таксама гаварыць не даводзіцца. Старыя адрыны даўно пакрывіліся, пад нагамі гной і бруд. Жывёлы стаяць у полі.
Домікі для цялятаў зараз практычна ўсе пустыя. Мясцовыя жыхары гавораць: ад галоднай смерці іх выратавала ранняя вясна. Каб хоць неяк пракарміць жывёл, іх вывелі на пашу.
Практычна такая ж сітуацыя і ў суседнім СВК. Цялятаў і кароў, якія тут загінулі, звальвалі ў яму. Падчас праверак Камітэт дзяржкантролю выявіў несанкцыянаваны могільнік. Дарэчы, які да прыезду нашай здымачнай групы аграрыі засыпалі зямлёй.
Аб сваіх праблемах у ААТ "Краснаслабодскае" нікуды не паведамлялі, і, паводле папер, прадпрыемства працуе цалкам нядрэнна. Аднак пазапланавая праверка паказала: паспяховасць - толькі на паперы.
Раман Гарэцкі, старшыня Жлобінскага міжраённага Камітэта дзяржкантролю: "Была ўстаноўленая нястача 594 галоваў буйнарагатай жывёлы, у выніку чаго прадпрыемству прычыненыя страты больш за мільярд рублёў. Устаноўлена практычна 80 тыс. тон прыпісаных кармоў, па выніках чаго людзі атрымлівалі незаконна заработную плату, налічаліся прэміі".
На думку кіраўнікоў СВК, засушлівае лета не дазволіла нарыхтаваць дастатковую колькасць кармоў. Зараз на двух прадпрыемствах вядзецца праверка.
Паводле слоў спецыялістаў дзяржкантролю, кармоў ва ўсім Акцябрскім раёне засталося толькі да канца месяца.
