Праз 2 гады замежныя госці "Кастрычніцкага форуму", цалкам імаверна, змогуць засяліцца ў новы шыкоўны гатэль, які пакуль носіць неганаровае імя самага вядомага ў краіне даўгабуду.
Гэта той самы "Кемпінскі" або "не-Кемпінскі", як яго назвалі пазней. Усё пайшло не так з самага пачатку. Першым сігналам да трывогі пільных мінчан стаў знос помніка архітэктуры - першай сталічнай электрастанцыі. Далей больш у прамым сэнсе гэтага слова. Будынак атрымаўся занадта вялікім і перакрыў увесь жывы і зялёны выгляд з праспекта. А яшчэ горш стала, калі комплекс не здалі своечасова - да чэмпіянату свету па хакеі ў 2014 годзе. Уладальнік сутыкнуўся з фінансавымі цяжкасцямі і будоўлю замарозілі. Тры гады пляцоўка пуставала. Шматлікія патрабавалі знесці будынак. Але знесці нельга - занадта дорага. Вось такая суцэльная чарада няўвязак. Была. Да канца гэтага верасня.
У комплексу з'явіўся новы ўладальнік - "Ашчадбанк Капітал". Даччыная кампанія расійскага Ашчадбанка сур'ёзна ўзялася за аб'ект, рыхтуецца здаць яго да 2020 года - новага тэрміну, што вызначыў Прэзідэнт, і ператварыць гэты будынак у высокаўзроўневы брэндавы гатэль з сусветным імем. Але самае галоўнае - "Ашчадбанк Капітал" хоча змяніць меркаванне мінчан аб гэтым аб'екце і зрабіць з гэтага пакуль яшчэ даўгабуду любімы гараджанамі комплекс у цэнтры сталіцы.
Што ж там будзе і якая карціна зараз унутры будынкаў? Наш рэпарцёр Юлія Пярцова стала першай, каго ўпусцілі ў сэрца даўгабуду. Эксклюзіўнае інтэрв'ю з кіраўніком праекта і кадры, якія да гэтага моманту амаль ніхто не бачыў.
Дарэчы, адной з галоўных умоў Мінска для новага інвестара было аднаўленне ўчастка веладарожкі ў парку Горкага. З-за будоўлі маршрут перапыніўся і прынёс нязручнасці аматарам велапрагулак. Інвестар абяцанне выканаў.
Асабіста пераканаўся ў гэтым Андрэй Шорац. Мэр Мінска, як і ўсе мінчане, вядома, зацікаўлены ў шчаслівым фінале гэтай будоўлі.
