Дзве дэлегацыі - з Аб'яднаных Арабскіх Эміратаў і Расіі - прымалі ў Парку высокіх тэхналогій

30 Чэрвеня 2019

Апроч спартыўных спаборніцтваў, мы сталі сведкамі і іншых значных падзей. Для пачатку зазірнём у Парк высокіх тэхналогій.

Беларусь сёння заканадавец мод у фарміраванні прававога поля развіцця лічбавай эканомікі. Мы задаём тон і гатовыя рухацца і далей, ствараць заканадаўчыя рэйкі для ўзлёту новых тэхналогій. Падпісаны восьмы дэкрэт спрацаваў з вялікім плюсам. За мінулы год экспарт ПВТ - паўтара мільярда долараў, і колькасць кампаній-рэзідэнтаў набліжаецца да шасцісот. Да таго ж беларускімі ІТ-рашэннямі для эканомікі і інтэрнэту рэчаў цікавяцца нашы партнёры і на Захадзе, і на Усходзе. 

Нягледзячы на тое што львіная доля экспарту высокатэхналагічнай прадукцыі прыпадае на амерыканскі і еўрапейскі рынак, мы гатовыя павялічваць сваю прысутнасць і на новых. На тыдні адразу дзве дэлегацыі - з Аб'яднаных Арабскіх Эміратаў і Расіі - прымалі ў парку. Чым здзіўлялі і што прапаноўвалі ў лічбе? Ведае наш карэспандэнт Святлана Лук’янюк. 

Здзіўляць нашы айцішнікі ўжо прывыклі: прызы на сусветных форумах, кантракты з вядомымі брэндамі, дадаткі, запампаваныя мільёнамі. Беларусь пацвярджае статус ІТ-краіны справай. Прававая база восьмага дэкрэта спрацавала. 

Зараз у беларускім Парку высокіх тэхналогій 563 рэзідэнты. Прычым 61 кампанія далучылася літаральна ў пачатку чэрвеня. І гэта ў асноўным прадуктовыя кампаніі з ІТ-рашэннямі для прамысловасці і інтэрнэту рэчаў. Уласна, тое, што сёння цікава і запатрабавана на рынку.

У экспарце прапаноўваем лепшае. Расійская дэлегацыя на чале з віцэ-прэм'ерам Максімам Акімавым, які курыруе якраз гэтую сферу, з парога ПВТ акунаецца ў лічбу. Вось галаграма, якая лунае. 3D-малюнкі любога маштабу. Наперадзе - магчымасць паўтараць міміку і жэсты чалавека. А палепшыць навыкі кіравання можна на аўто або матацыкле. Віртуальна. Ад такой магчымасці цяжка адмовіцца. 

Усё больш тэхналагічны сёння і АПК. Алічбоўка палёў - у дапамогу аграрыям і тым, хто закупляе збожжа. Ураджайнасць, памеры палёў, рэйтынг сельгаскультур. Еўропа і Амерыка ўжо ў лічбе. Да канца года абяцаюць гэты спіс папоўніць і расійскімі ўгоддзямі.

Сёння ў ПВТ гавораць: раней было проста ІТ, а зараз хай-тэк. Оптыка для ваенпрама, тут Расія пакупнік сталы. Цікавасць і да медыцынскіх распрацовак - электронны стэтаскоп для дыстанцыйнай дыягностыкі. І лазеры для касметалогіі. 3 000 кліентаў за мяжой. І гатовасць ужо прапанаваць новыя прадукты. 

Аляксей Гулевіч, кіраўнік аддзела продажаў і маркетынгу ІТ-кампаніі ПВТ Беларусі:

"Толькі 5 кампаній у свеце рабілі апараты для захавання донарскіх органаў. Летась сумесна з РНПЦ траўматалогіі мы распрацавалі прататып для захавання жыцця донарскіх органаў, які рыхтуе іх да хуткай аперацыі".

Пакупнікі беларускіх высокіх тэхналогій па ўсім свеце. Але львіная доля экспарту ідзе ў ЗША і Еўропу - да 90 працэнтаў. На той жа расійскі рынак прыпадае менш за пяць.  

Таксама гатовыя дзяліцца і асновамі прававой лічбавай сістэмы. Цікавасць да яе вялізная і ў суседзяў, і ў далёкім замежжы. Напрыклад, нормы нашага восьмага дэкрэта знайшлі водгук у расійскім Грамадзянскім кодэксе, там уведзена такое паняцце, як лічбавыя правы і смарт-кантакты. Там закон падпісаны ў сакавіку. А мы як заканадаўцы моды ўжо глядзім наперад, каб і далей задаваць тон. Сёння ў свеце заканадаўча не ахоплены такі пласт, як лічбавая маёмасць: гульнявыя манеты, золата, акаўнты ў сацсетках. 

Як гэта зараз адбываецца з крыптабіржай. Беларусь напісала ўсё з нуля наконт крыптавалют, токенаў, тэхналогіі блакчэйн. Расійскім гасцям якраз і распавялі, як працуе першая беларуская крыптабіржа.

А гэта супярэчыць догмам ЕАЭС, дзе якраз прапісана вольнае перамяшчэнне тавараў і паслуг і адзіныя правілы гульні. Тым больш што цікавасць у бізнесу ёсць. Асабліва да тэхналогій з прыцэлам на заўтра. Як, напрыклад, віртуальныя ўрокі. Рэзідэнт ПВТ ужо прапаноўвае школам так вывучаць хімію і астраномію. 

Вопыт Беларусі ў віртуальным навучанні цікавы і Аб'яднаным Арабскім Эміратам. На тыдні іх прадстаўнікі Міністэрства адукацыі таксама знаёміліся з нашымі распрацоўкамі. А працяг супрацоўніцтва плануецца ў рамках сусветнай выставы "Экспо-2020" у Дубаі. У ёй прымуць удзел беларускія ІТ-кампаніі і стартапы.