Дом сумеснага пражывання для пажылых, якія самі могуць паклапаціцца пра сябе, урачыста адкрыты сёння ва Уздзенскім раёне. Утульныя пакоі, уласная кухня і сучасная бытавая тэхніка. Такая форма сацыяльнага абслугоўвання набірае папулярнасць у цэнтральным рэгіёне і не выключана, што ў будучым ў кожным раёне з’явіцца па некалькі такіх дамоў. Новыя ўмовы для пражывання ацаніла Антаніна Станкевіч.
Былы будынак сельсавета рэканструявалі за даволі кароткі час. Так што дом з цёплымі шклопакетамі, унушальнымі жалезнымі дзвярыма і драўляным фасадам выглядае даволі камфортным і сучасным. Адначасова тут могуць жыць пяць чалавек, але ў будучыні іх колькасць можа павялічыцца.
Старшыня вёскі Глінкі Ядвіга Рубашная жартуе: самой ёй у такі дом яшчэ рана. Але жанчына ва ўзросце ўпэўнена: пажылым тут будзе камфортна. У доме ёсць і ацяпленне, і гарачая вада, і не сумна.
Некалькі жылых пакояў, кухня, ванная - і гэта толькі бытавыя ўмовы. Побач з пажылымі будзе заўсёды сацработнік. Па стандартных тарыфах ён зможа аказаць дадатковыя паслугі: прыгатаваць ежу ці прынесці лекі, напрыклад.
Кошт пражывання ў такім доме даволі прымальны - 49 тысяч рублёў за суткі. І гэта з улікам ацяплення. Летам кошт значна знізіцца, запэўніваюць спецыялісты.
Першыя жыхары справяць уваходзіны тут у студзені. Тэрмін знаходжання ў такім доме неабмежаваны, але, як правіла, пажылыя звычайна застаюцца ў такіх дамах хіба што толькі зімой.