Няйнакш як доўгачаканым навагоднім цудам стала вызваленне і вяртанне беларускіх урачоў з лівійскага палону. Сёння яны прыбылі ў Маскву, заўтра іх чакаюць у Мінску. Жонка і муж з Гомеля - Іна Бабуш і Сяргей Здота - знаходзіліся ў гэтай паўночнаафрыканскай краіне з 2010 года, дзе працавалі па кантракце. Медыкі выказалі падзяку і адзначылі зладжаную працу МЗС Беларусі і Расіі па іх вызваленні, а таксама дапамогу кіраўніка Чачні. Рамзан Кадыраў асабіста сустрэўся з беларусамі ў Маскве.
Падрабязнасці ў Дар'і Белавусавай-Пятроўскай. Аб тым, што беларускія ўрачы вызвалены з палону ў Лівіі і вяртаюцца дахаты, стала вядома сёння раніцай. Такая практыка перамоў. Каб яны прайшлі паспяхова, усю інфармацыю трымаюць у поўным сакрэце. Дзякуючы зладжанай працы МЗС Лівіі, Расіі і Беларусі, а таксама непасрэднай падтрымцы Прэзідэнта Чачні Рамзана Кадырава нашы суайчыннікі прыбылі з Лівіі ў Маскву.
Аб тым, што яны вызвалены, і два месяцы хваляванняў, нерваў і страху ў мінулым, Сяргей і Іна зразумелі толькі ў самалёце. У Лівіі працавалі па кантракце з 2010 года ў прыватнай клініцы. Ён урач-траўматолаг. Яна аперацыйная сястра.
З-за грамадзянскай вайны, якая разгарэлася ў Лівіі ў 2011 годзе, сёння ў краіне няма ні пасольства Беларусі, ні пасольства Расіі. Таму звяртацца па дапамогу было фактычна няма куды. Сітуацыя здавалася бязвыхаднай.
Але ні Сяргей, ні Іна не ведалі, што аб іх вызваленні дамаўляліся на самым высокім узроўні.
Пасля зносін з журналістамі Іна ўжо не хавае слёз. Разумеючы, што яны з мужам у бяспецы, эмоцыі бяруць верх. А Сяргей спяшаецца патэлефанаваць самаму дарагому чалавеку - маме.
Родныя і блізкія беларускіх урачоў сёння цэлы дзень не адыходзяць ад тэлевізара. Навіна, што іх дарагія і любімыя ляцяць на радзіму, для кожнага сапраўдны навагодні падарунак да свята.
Павіншаваць Іну і Сяргея з вызваленнем прыехаў прэзідэнт Чачні. Так супала, што сёння Рамзан Кадыраў быў з рабочым візітам у Маскве.
Гэтую ноч беларускія ўрачы Сяргей і Алена правядуць у Маскве. А заўтра самалётам адправяцца ў Мінск з верай у цуды і добрыя ўчынкі.
