Дактарам удалося за два дні прадухіліць разрыў аорты ў чатырох чалавек

23 Сакавіка 2017

Найскладанейшая аперацыя без скальпеля. Беларускія хірургі разам са сваімі галандскімі калегамі першыя ў СНД паставілі спецыяльны імплантат цалкам новым спосабам. Дактарам удалося за два дні прадухіліць разрыў аорты ў чатырох чалавек. Прычым кожны з іх выйдзе з бальніцы праз некалькі дзён. З першымі пацыентамі адразу пасля аперацыі пагутарыла Юлія Грызунт.

Амаль пустая медкарта - і так большую частку жыцця. Паводле слоў Андрэя Юшкевіча, у маладосці вёў здаровы лад жыцця, займаўся спортам, праблем са здароўем не было наогул. Усё змянілася, калі на адным з абследаванняў урач заўважыў, што галоўная артэрыя сэрца мужчыны павялічаная. Зараз былы начальнік ДАІ Партызанскага раёна для ўрачоў - сапраўдны экспанат. Бо менавіта яму ўпершыню ў СНД зрабілі цалкам новую аперацыю.

Андрэй Юшкевіч, пацыент: "У мяне такое жыццё было напружанае, што я пабываў у такіх месцах і перанёс такое, што я ніколі не баюся! Я сябе адчуваў учора вельмі добра, вельмі добра. Нават не чакаў такога. І зараз сябе адчуваю добра".

І праз некалькі дзён гэты пацыент ужо зможа вярнуцца дамоў. Бо зараз аперацыя праходзіць не па класічным сцэнарыі - ніякага скальпеля. Для выратавання жыцця дастаткова зрабіць два праколы ў раёне пахвіны і праз спецыяльную трубку ўвесці новую частку аорты ў арганізм. Яна мацуецца да сасудаў і з часам становіцца іх часткай.

Такі імплантат падбіраецца для кожнага пацыента індывідуальна. Ён складаецца з нітэнола і дакрона. І цалкам паўтарае канфігурацыю сасуда. Іншымі словамі - самастойна выпростваецца да патрэбнага памеру. Каб зрабіць такі ўнікальны імплантат, амерыканскім медыкам спатрэбілася больш за 10 гадоў.

У Еўропе з дапамогай гэтай прылады - стэнграфта - удалося прадухіліць разрыў аорты ўжо ў 2 з паловай тысяч чалавек. У нас учора прайшлі першыя два падобныя ўмяшанні. З самай раніцы хірургі рыхтуюцца да замацавання новых ведаў. Бо сёння калегі з Нідэрландаў проста назіраюць за працэсам. Зараз новая аперацыя ў кампетэнцыі беларускіх медыкаў.

Алег Паланецкі, загадчык рэнтгенаперацыйнай РНПЦ "Кардыялогія": "Для пацыента гэтая аперацыя непараўнальна больш лёгкая, чым аперацыя адкрытая. І ў пацыентаў, асабліва ў пажылых, у пацыентаў са спадарожнымі захворваннямі часцяком гэтая аперацыя з'яўляецца адзіным варыянтам дапамагчы".

Для каманды хірургаў з Нідэрландаў сумесныя аперацыі - крок наперад. Нашы медыкі падзяліліся вопытам працы і яшчэ адным высокатэхналагічным метадам. Так званае кантраснае рэчыва ўводзіцца ў орган пацыента, пасля пад спецыяльным рэнтгенам уся яго крывяносная сістэма бачная дэталёва. Такім чынам можна прааперыраваць самыя цяжкадаступныя месцы без рызыкі выпадковых парэзаў. Беларускія медыкі гэтым спосабам карыстаюцца ўжо некалькі гадоў, хоць гэта рабіць умеюць далёка не ў кожнай клініцы свету. Для ўводу кантрастаў у нас ёсць спецыяльнае абсталяванне, яно дазваляе рабіць працэдуру, не перарываючы аперацыі. Зараз такую ўсталёўку плануюць закупіць і галандскія калегі.

Ян Вевер, сасудзісты хірург (Нідэрланды): "Я быў вельмі прыемна здзіўлены ўзроўнем адукаванасці, прафесіяналізму вашых урачоў. І тым, як абсталяваны шпіталь, тым, як працуе каманда".

Асноўнай прычынай смяротнасці на Зямлі былі і застаюцца сардэчна-сасудзістыя захворванні. Гэта бяда, якая можа адбыцца з кожным, яна не шкадуе ні жанчын, ні дзяцей, а панацэя - нават не здаровы лад жыцця або выконванне рэжыму. У лютым 2009 года ў РНПЦ "Кардыялогія" нашай краіны ўпершыню перасадзілі новае сэрца. З тых часоў штогод такая працэдура праходзіла ад 10 да 40 разоў за год. У канцы 2016-га тут жа практычна ствараюць новага чалавека.

Трансплантацыя адначасова сэрца і лёгкіх. Сёння для высокатэхналагічных аперацый ужо выкарыстоўваюць 3D-мадэль сэрца, у кожнай аперацыйнай - самае сучаснае сусветнае абсталяванне. Але галоўнае, вядома, самі медыкі, якія кожны дзень сваімі рукамі здзяйсняюць сапраўдныя цуды.