Толькі ў Мінску са сваёй першай настаўніцай пазнаёмяцца больш чым 23 тысячы дзяцей. Па ўсёй краіне ўпершыню за парты сядуць каля 110-ці тысяч хлопчыкаў і дзяўчынак. У бацькоў зараз самая гарачая пара - апрануць, абуць і падрыхтаваць дзіця да школы. На дапамогу прыходзяць кірмашы і базары. Дарэчы, сёння ў сталіцы адкрыліся буйныя выставы "Нашым дзецям" і "Добры дзень, школа". Але, на жаль, па-ранейшаму ёсць дзеці, бацькі якіх зусім забылі, што значыць клапаціцца, аказваць увагу і падтрымку. Такія хлопчыкі і дзяўчынкі не застануцца без падарункаў да школы. Належную ўвагу нададуць і шматдзетным сем'ям. Па ўсёй краіне зараз праходзяць дабрачынныя марафоны. Пра мары самых маленькіх беларусаў раскажа Наталля Тарасюк.
6-гадовы Улад Махнач 1 верасня ўпершыню сядзе за школьную парту. А пакуль ён уважліва вывучае змесціва свайго першага партфеля. Ранцы хлопчыкам і дзяўчынкам (а гэта 19 падапечных дзіцячага сацыяльнага прытулку аднаго з раёнаў сталіцы) сёння ўручыў Беларускі саюз жанчын. Не засталіся без падарункаў і выхаванцы цэнтра, для якіх пакуль на першым месцы гульні.
Мар'яна Шчоткіна, старшыня ГА "Беларускі саюз жанчын", міністр працы і сацабароны Беларусі: "Калі дзіця знаходзіцца ў сацыяльным прытулку, то значыць яно ў небяспечнай сітуацыі. І бацькі на гэтае дзіця ўвагі не звяртаюць і на яго партфель таксама ніхто ўвагі відавочна не звяртаў. І сёння, калі мы размаўлялі з дзецьмі, калі мы ўручалі партфелі (а яны, дарэчы, сабраныя, у іх ёсць усё, што трэба да школы), мы пачулі аб лёсах".
Усіх дзяцей тут аб'ядноўвае адно - ужо практычна праз тыдзень іх у школу адвядуць не мама з татам, а выхавальнік. Таму галоўная задача акцыі Саюза жанчын "Збяром партфель разам" - адзін з важных этапаў у жыцці дзіцяці зрабіць асаблівым.
Падчас сустрэчы госці не толькі ўручылі хлопчыкам і дзяўчынкам падарункі напярэдадні 1 верасня, але і распыталі аб дасягненнях, планах і марах. І дамовіліся ў сярэдзіне снежня сустрэцца зноў, каб даведацца, як у падапечных цэнтра ідуць справы ў школе.
Пад патранажам Беларускага саюза моладзі падрыхтаваць да школы дзяцей са шматдзетных сем'яў дапамагаюць і жыхары сталіцы. З пачатку жніўня кожны мог перадаць патрэбныя да школы рэчы валанцёрам у гандлёвых цэнтрах. І сёння ў Мінску на некалькі дзясяткаў дзіцячых усмешак стала больш. Свае першыя ў жыцці партфелі атрымалі ў падарунак хлопчыкі і дзяўчынкі са шматдзетных сем'яў. У рукзаках аказалася ўсё, што неабходна першакласніку, - ад сшыткаў, каляровай паперы і кардона да пеналаў з ручкамі і алоўкамі. Па сутнасці сімвалічнае ўручэнне падарункаў - толькі пачатак вялікага марафону "У школу з добрым сэрцам", які прадоўжыцца аж да сярэдзіны верасня.
Дарэчы, прапанаваць новы касцюм, абутак, сшыткі або пенал па ўсёй краіне гатовыя амаль 6,5 тысячы магазінаў. Больш за тое, сабраць дзіця ў школу бацькі змогуць і на буйных выставах "Нашым дзецям" і "Добры дзень, школа", якія сёння адкрыліся ў сталіцы.
Уладзімір Калтовіч, міністр гандлю Беларусі: "Сёння выстава - гэта своеасаблівы вынік працы па рэалізацыі дадзенага асартыменту. За ліпень-жнівень у гандлі будзе праведзена больш за 2 тысячы выставачна-кірмашовых мерапрыемстваў".
Кірмашы прадоўжацца да 31 жніўня. Адзначым, што ў гэты дзень у многіх школах пройдуць лінейкі. А па ўсёй краіне званок упершыню празвініць для амаль 110 тысяч першакласнікаў.
