Сёння ва ўсіх школах рэгіёна стартаваў першы навучальны тыдзень. Тэматычныя ўрокі сёлета прысвечаны Году малой радзімы.
Для сталічных школьнікаў заняткі прайшлі ў музеях, парках і на мемарыяльных комплексах. Напрыклад, біялогію вучні вывучалі на экалагічнай сцежцы, а дакладныя навукі ў Акадэміі авіяцыі. Рэпартаж Наталлі Кезік.
Самалёты, дыспетчарскія пункты і інжынерныя авіявынаходкі наяве. Яна Былінка ў Акадэміі авіяцыі сёння ўпершыню. Школьніцы прыйшліся даспадобы прататыпы дэталей рухавіка, машыны для механічных выпрабаванняў і строгая форма авіякурсантаў. Такі ўрок дапамог старшакласніцы адназначна выбраць будучую прафесію.
Амаль паўсотні школьнікаў сорак шостай школы Мінска сёння фізіку і матэматыку вывучалі, так сказаць, на практыцы. Першы ўрок правялі на аэрадроме побач з самалётамі, у праектных майстэрнях і лабараторыі.
Званок для вучняў 25-ай гімназіі сталіцы сёння празвінеў не вельмі гучна, бо першы ўрок у школьнікаў прайшоў на экалагічнай сцяжынцы з біноклямі ў руках.
І каб не спалохаць птушак, навокал павінна быць цішыня. Кожнаму школьніку для назіранняў - асабісты бінокль. А ўрок пачалі з самай раніцы - для птушак гэта найбольш актыўны час. Экасцяжынка ў Заводскім раёне з'явілася ў пачатку лета. І заняткі для школьнікаў на свежым паветры - новы фармат, да якога цяпер вучні будуць прывыкаць. У гэтым навучальным годзе настаўнікі плануюць тут час ад часу арганізоўваць выязныя ўрокі па біялогіі і беларускай мове.
Для сталічных школьнікаў сёння першыя ўрокі прайшлі таксама на мемарыяльных комплексах, ва ўніверсітэце грамадзянскай абароны, у музеі Міністэрства ўнутраных спраў. А наперадзе - прадукцыйны навучальны год - з новымі ведамі, знаёмствамі і планамі.
