Экалагічную праблему ў Дзятлаўскім раёне на мясцовым узроўні вырашыць пакуль не атрымоўваецца. Вёску ў Гродзенскай вобласці заліваюць адходы фермы. Пасля чарговага прарыву дамбы адстойніка некалькі двароў апынуліся затопленыя літаральна гнаявой жыжкай, а вада ў студнях стала непрыдатнай для ўжывання. Да рашэння пытання далучыліся спецыялісты дзяржкантролю. На месца НЗ адправілася і наша здымачная група.
Жыхар вёскі Мядзвінавічы Барыс Налівайка ваду са студні нават свойскай жывёле не прапаноўвае. Такая вадкасць, жартуе, толькі на паліў гароду добрая - адразу з арганічнымі ўгнаеннямі. А ўсё таму, што з фермы па суседстве некалькі дзён цяклі адходы проста на ўчасткі вяскоўцаў.
Прычына экалагічнай праблемы - вось гэта, практычна возера, гнаявой жыжкі, плошчай каля гектара і глыбінёй да двух метраў. Падчас моцных дажджоў дамба не вытрымлівае, і ўся гэтая маса выцякае на вёску.
Чарговае НЗ здарылася днямі. Тоны бруднай вадкасці змяталі практычна ўсё на сваім шляху. У выніку студні вяскоўцаў ператварыліся проста ў памыйныя ямы. Супрацоўнікі санстанцыі, якія прыехалі на месца, катэгарычна забаранілі ўжываць такую ваду ў ежу.
У праблему прыйшлося ўмяшацца дзяржкантролю. Апынулася, што адстойнікі на ферме пабудаваныя самавольна і за імі ніхто не сочыць.
Праўда, пакуль планы застаюцца толькі на паперы. З моманту НЗ прайшло некалькі дзён, а ў вёсцы дагэтуль не арганізаваны падвоз чыстай вады. Вяскоўцы ж з надзеяй чакаюць надыходу халадоў. Гавораць, зімой патоп наўрад ці адбудзецца.
