Сёння свята ўладароў стыхій! Дзень утварэння выратавальнай службы адзначаюць па ўсёй краіне прадстаўнікі Міністэрства па надзвычайных сітуацыях. Ужо па традыцыі ўрачыстасць у Мінску адкрылася з ускладання кветак да манумента Перамогі і парада на галоўным праспекце краіны. Тысячы мінчан і гасцей сталіцы маглі назіраць пешыя калоны байцоў МНС, а таксама імправізаваную выставу тэхнікі - эвалюцыю пажарных машын ад экземпляраў з мінулага да суперсучасных агрэгатаў.
Урачыстасці з нагоды Дня ратавальніка працягваюцца дагэтуль. Асноўная пляцоўка ў сталіцы - гэта парк Горкага. Там ужо выступілі з пляцканцэртам навучэнцы камандна-інжынернага інстытута. Цікава было паглядзець і на шоу на вадзе, якое ўладкоўвалася вадалазнай службай і піратэхнікамі. Свята будзе працягвацца да самага вечара.
