Сёння актуальныя пытанні жыцця краіны, сярод якіх і дэкрэт № 1, абмеркаваў прафсаюзны актыў. Так, у спецыяльныя камісіі, якія будуць дапамагаць у вырашэнні праблемных пытанняў на рынку працы, увойдуць і прадстаўнікі прафсаюзаў. Рэалізацыя дакумента аб садзейнічанні занятасці, як было адзначана, дазволіць забяспечыць роўную сацыяльную адказнасць усіх беларусаў. Максімальныя ўмовы для тых, хто хоча працаваць, дапамога ў цяжкай сітуацыі і стымуляванне да занятасці для тых, хто не хоча працаваць. А яшчэ дакумент павінен дапамагчы вывесці з ценю шэрую эканоміку, тых, хто працуе, а падаткі не плаціць. Як сёння вырашаецца пытанне працаўладкавання ў рэгіёнах краіны, якія ініцыятывы для добрасумленных работнікаў прапануе Федэрацыя прафсаюзаў. Падрабязна Вераніка Бута.
Стварэнне новых рабочых месцаў, індывідуальны падыход да кожнага, хто шукае працу - гэта аснова дэкрэта № 1. Як рэалізаваць дакумент на практыцы - абмяркоўваў сёння прафсаюзны актыў краіны. Напрыклад, прагучала ініцыятыва: прадугледзець гарантыі прадаўжэння кантрактаў, дадатковыя магчымасці перанавучання супрацоўнікаў. У федэрацыі адзначылі - падыход у пытаннях занятасці павінен быць комплексным.
Афіцыйна ў Камянецкім раёне крыху менш за 30 непрацаўладкаваных. Гэта адзін з самых лепшых вынікаў па краіне. Амаль дзве сотні вакансій. На аднаго беспрацоўнага - 6 спецыяльнасцей. Вялікія чаканні звязваюць з бязвізавым рэжымам - Камянецкі раён увайшоў у спіс ільготных для іншаземцаў, якія падарожнічаюць. Сёння там перспектыўна пачынаць свой бізнес.
8 кірмашоў вакансій правялі ў раёне за мінулы год. А інфармацыю з пазнакай "патрабуюцца" і зусім публікуюць у кожным выпуску мясцовай газеты.
Сёння ў штаб-кватэры Федэрацыі прафсаюзаў, дзе актыў арганізацыі абмяркоўваў крокі па рэалізацыі першага дэкрэта, Камянецкаму аб'яднанню было што сказаць аб працаўладкаванні ў сваім рэгіёне. На думку кіраўніка федэрацыі, Дэкрэт "Аб садзейнічанні занятасці" стаў лагічным працягам лібералізацыйнага пакета, падпісанага ў канцы года.
У Клічаўскім раёне сітуацыя не з простых. Больш за палову рэгіёна - лес, няма буйных прамысловых прадпрыемстваў. Хіба што невялікі філіял па пашыве адзення, і туды сёння патрэбныя людзі. Мясцовы цэнтр занятасці сёлета будзе весці перападрыхтоўку швачак. У сярэднім па раёне дзве вакансіі на аднаго беспрацоўнага, але ў асноўным не ў горадзе. Летась 16 чалавек гэтага не спалохаліся, перакваліфікаваліся ў механізатараў і змянілі беспрацоўны статус на запіс у працоўную кніжку і стабільную зарплату.
Прафсаюзы прапануюць: трэба даць больш гарантый на заканадаўчым узроўні добрасумленным працаўнікам. Напрыклад, абавязкова прадаўжаць кантракты тым, хто працаваў без заўваг або і зусім пераводзіць іх на бестэрміновыя дамовы. Гэта ў прыватнасці. А ў цэлым у дэкрэце прапісана галоўнае - роўнасць усіх беларусаў і адказнасць сацыяльная.
У рэгіёнах ужо пачынаюць арганізоўваць спецыяльныя камісіі - на іх будзе асноўная адказнасць за беспрацоўе. У іх склад увойдуць дэпутаты, мясцовая ўлада, сацыяльныя службы і прафсаюзы. Асноўная задача - стварыць усе ўмовы, каб у чалавека была магчымасць для працаўладкавання ў любым кутку краіны.
