Дэкларацыю па спыненні эпідэміі СНІДу падпісаў сёння мэр Мінска Андрэй Шорац. Такім чынам беларуская сталіца стала чарговым буйным горадам Еўропы, які падтрымаў Парыжскую дэкларацыю. У мерапрыемстве прынялі ўдзел міністры аховы здароўя, прадстаўнікі міжнародных арганізацый, эксперты фармацэўтычных кампаній з дванаццаці краін Усходняй Еўропы і Цэнтральнай Азіі. Беларуская сталіца бярэ абавязак па дасягненні так званых мэт "дзевяноста".
Хутка Мінск далучыцца і да праекта "Здаровыя гарады". Працэдура будзе паскоранай, каб паспець да II Еўрапейскіх гульняў. Гэта крок да кожнага жыхара горада і яго разумення асабістай адказнасці за сваё здароўе.
Дарэчы, рашэнне аб правядзенне канферэнцыі ў Мінску было прынята невыпадкова. Наша краіна дасягнула "Мэт тысячагоддзя". Скараціўся ўзровень дзіцячай смяротнасці, палепшыліся ўмовы аховы мацярынства, значныя поспехі ў прафілактыцы ВІЧ-інфекцый. Паводле ацэнак міжнародных экспертаў, Беларусь займае адно з вядучых месцаў у свеце па даступнасці насельніцтву медыцынскіх паслуг.