Дайджэст Магілёўскай вобласці

Маштабная праверка школ на выкананне дзяржаўных стандартаў. Студэнцкія атрады падвялі вынікі працоўнага семестра. А кожны дарослы атрымаў шанц стаць чараўніком. Насычаным выдаўся тыдзень для ўсходняга рэгіёна краіны. Усе падрабязнасці ў дайджэсце з Магілёўскай вобласці. 

Расказвае Андрэй Ястрабаў. Бяспека, выкананне санітарных нормаў - па даручэнні Прэзідэнта ў Беларусі праходзіць маштабная праверка навучальных устаноў на адпаведнасць дзяржаўным стандартам. Раённыя, абласныя групы, у склад якіх увайшлі спецыялісты розных галін, у тым ліку ўпраўленняў капітальнага будаўніцтва, пажарныя,  знаёмяцца з умовамі па арганізацыі навучальнага працэсу. Вода- і цяплозабеспячэнне будынкаў, работа апавяшчальных сістэм на выпадак надзвычайных сітуацый, зверка дакументаў - заўвагі павінны быць узяты на кантроль.

Больш за тры тысячы студэнтаў Магілёўскай вобласці сёлета правялі канікулы з карысцю. Дапамагалі ў рэканструкцыі малочна-таварных комплексаў, добраўпарадкаванні і будаўніцтве. Далучыліся педагагічныя і медыцынскія атрады. 30 самых актыўных памочнікаў па выніках года атрымалі ўзнагароды і падарункі. Дарэчы, урачыстасць прайшла ў актавай зале новай сучаснай школы  магілёўскага мікрараёна Казіміраўка. На яе ўзвядзенні сёлета таксама працавала моладзь. Пра гэта цяпер нагадвае спецыяльная таблічка.

Магілёўскі завод ліфтавага машынабудавання паставіў сёлета на ўнутраны рынак Беларусі больш за 3500 тысяч ліфтаў. Напрыклад, у Магілёве камунальшчыкі рапартуюць аб выкананні праграмы па замене старых ліфтаў, а гэта 268 адзінак абсталявання. Плюс 121  з леташніх планаў. Да сярэдзіны снежня яшчэ 34 новенькія ліфты ўпрыгожаць шматпавярхоўкі абласнога цэнтра. 

Магілёў далучыўся да рэспубліканскай дабрачыннай акцыі "Цуды на Каляды". Яе візітнай карткай стала ёлка жаданняў. Яна з’явіцца ў гандлёвых цэнтрах. А ўпрыгожана будзе не толькі цацкамі, але і паштоўкамі ў адрас Дзеда Мароза  ад дзяцей, якім патрэбная дапамога. Стаць чараўніком здолее любы дарослы -  трэба толькі набыць падарунак і пакінуць яго ў спецыяльным куфры, які адкрыюць напярэдадні Новага года.   Дзякуючы акцыі здзейсняцца жаданні соцень маленькіх жыхароў краіны.